Sırııadaǵy tutqıyl shabýyl: AQSh-tyń eki áskerı qyzmetkeri men azamaty opat boldy

ASTANA. KAZINFORM — Sırııada «Islam memleketi» uıymynyń sodyry uıymdastyrǵan tutqıyl shabýyl saldarynan AQSh-tyń eki áskerı qyzmetkeri men bir azamaty qaza tapty. Bul týraly AQSh Qarýly kúshteriniń Ortalyq qolbasshylyǵy (CENTCOM) habarlady, dep jazady Sınhýa.

CENTCOM málimdemesine sáıkes, taǵy úsh áskerı qyzmetker jaraqat alǵan.

— Shabýyl jasaǵan qarýly adam kóz jumdy. Qaza tapqandardyń otbasylaryna qurmet bildirý jáne Pentagonnyń saıasatyna sáıkes, áskerı qyzmetkerlerdiń aty-jóni jaqyn týystaryna habarlanǵannan keıin 24 saǵat ótken soń ǵana jarııalanady, — delingen habarlamada.

AQSh ákimshiligi Palmıra aýdanyna jaqyn jerde sırııalyq-amerıkalyq birlesken patrýlge jasalǵan shabýyldy uıymdastyrýǵa kináli tulǵalardy jaýapkershilikke tartatynyn málimdedi. Bul týraly AQSh Memlekettik departamenti memlekettik hatshy Marko Rýbıo men Sırııanyń ótpeli úkimetindegi syrtqy ister mınıstri Asaad ash-Sheıbanı arasyndaǵy telefon áńgimesiniń qorytyndysy boıynsha jarııalanǵan málimdemede aıtylǵan, dep jazady TASS.

Málimdemede atap ótilgendeı, syrtqy ister mınıstri Asaad ash-Sheıbanı kóńil aıtyp, Sırııa úkimetiniń «Islam memleketi» terrorıstik uıymynan tónetin ortaq qaýiptiń aldyn alý jáne ony joıýǵa beıildiligin rastady.

— Amerıka Qurama Shtattary amerıkalyqtarǵa zııan keltiretin jáne qaýip tóndiretin barlyq tulǵalardy jaýapqa tartady, — delingen AQSh Memlekettik departamentiniń málimdemesinde.

Buǵan deıin senbi kúni Sırııanyń resmı SANA aqparat agenttigi Sırııanyń ortalyq bóligindegi Palmıra qalasynyń mańynda sırııalyq jáne amerıkalyq áskerı qyzmetkerlerden quralǵan birlesken patrýlge oq atylǵanyn habarlaǵan edi.

Agenttik málimetinshe, oqıǵa saldarynan eki sırııalyq áskerı jaraqat alyp, birneshe amerıkalyq áskerı qyzmetker jaraqattanǵan, al shabýyl jasaǵan adam oqıǵa ornynda qaza tapqan.

Budan buryn Aýstralııada terrorıstik shabýyldan qaza bolǵandar sany 12 adamǵa jetkenin jazdyq.