Sırııadaǵy turaqsyzdyqtar týraly ne belgili

ASTANA. KAZINFORM – Qarasha aıynyń sońynda Sırııanyń qarýly toptary úkimettik kúshterge qarsy qýatty shabýylyn bastaǵan edi. Sırııadaǵy qarýly qaqtyǵysty saıası jolmen sheshýge baǵyttalǵan Astana kelisimi buzylyp, Taıaý Shyǵystan taǵy da maza ketti. Osy oraıda Kazinform agenttigi Sırııadaǵy qaqtyǵys boıynsha Astana ýaqytymen saǵat 20:00-degi jaǵdaıǵa sholý usynady.

Shabýylǵa «Haııat Tahrır ash-Sham» áskerılendirilgen ıslamshyl toby basshylyq jasady. Bul top uzaq jyldarden beri Sırııa janjalyna qatysyp keledi. Sırııadaǵy azamattyq soǵys jyldarynda ol «Djebhat an-Nýsra» degen ataýmen (Qazaqstanda tyıym salynǵan uıym — avt.) tanymal boldy jáne «Ál-Kaıdanyń» (bul uıymǵa da elimizde tyıym salynǵan — avt.) burynǵy sırııalyq bólimshesi sanaldy.

30 qarasha kúni olar Sırııadaǵy kólemi jaǵynan ekinshi orynda turǵan Aleppo qalasynyń basym bóligin baqylaýǵa alsa, 6 jeltoqsanda – Sırııanyń tórtinshi úlken qalasy Hamany basyp aldy.

Al búgin Sırııanyń qarýly oppozıtsııasy el astanasy Damaskini jaýlap alǵanyn, al prezıdent Bashar Asad elden qashqanyn málimdedi.

Buǵan deıin Eýropalyq Odaqtyń Syrtqy ister qyzmeti Sırııadaǵy jaǵdaı boıynsha málimdeme taratqan edi. 

Qytaı da Sırııadaǵy jaǵdaıdy muqııat baqylap otyrǵanyn jáne elde turaqtylyqtyń múmkindiginshe tezirek qalpyna kelýine úmittenetinin jetkizdi.

Al Reseı Syrtqy ister mınıstrligi Bashar Asadtyń bılikti beıbit jolmen tapsyratynyn aıtyp, elden ketkenin atap ótti. 

Óz kezeginde Qazaqstannyń Qorǵanys mınıstrligi Golan jotalaryndaǵy bitimgerlerdiń qaýipsizdigi úshin qajetti shara qabyldap jatyr. Qazaqstandyq bitimgerler qyzmet etetin BUU-nyń Golan jotalaryndaǵy (SONNR) jaýapkershilik aımaǵyndaǵy jaǵdaı shıelenisti, biraq turaqty dep baǵalanyp otyr.

Buǵan deıin Kazinform Bashar Asadtyń ómirbaıanyn, Taıaý Shyǵystyń eń kúrdeli jáne qaqtyǵysqa toly elderiniń birin qalaı basqarǵanyn sholyp kórdi.