Sırııadaǵy tóńkeris: Qazaqstandyq bitimgerler BUU-nyń 24 qyzmetkerin evakýatsııalady
ASTANA. KAZINFORM – 2024 jyldyń sońynda Sırııada bolǵan memlekettik tóńkeris kezinde Qazaqstannan barǵan bitimgerler birqatar mıssııa atqardy. Ol týraly birinshi ulttyq kontıngenttiń komandıri – podpolkovnık Jiger Aıypov aıtyp berdi.
— Bitimgerlik mıssııany oryndaý barysynda adam shyǵyny bolǵan joq. Bizdiń kontıngent barlyq tapsyrmany tolyq oryndap, joǵary jaýyngerlik daıyndyq deńgeıin kórsetti. Degenmen, kontıngent naqty jaǵdaıda áreket etken kezder boldy, - dedi bitimgerlik mıssııasyn aıaqtap elge oralǵan Jiger Aıypov.
Odan ári komandır Sırııada memlekettik tóńkeris kezinde bitimgerler atqarǵan qyzmetke toqtaldy.
— Ózderińiz bilesizder, 2024 jyldyń qarasha-jeltoqsan aılarynyń sońynda memlekettik tóńkeris boldy. Sol kezde bizdiń kontıngenttiń kúshimen BUU-nyń 24 qyzmetkeri evakýatsııalandy, mıssııanyń jaýapkershilik aımaǵyndaǵy BUU bazalary kúsheıtildi, sondaı-aq 400-den astam oq-dári joıyldy. Bul halyqty qorǵaýǵa aıtarlyqtaı úles qosty, - dep tolyqtyrdy ol.
Aıta keteıik, búgin qazaqstandyq bitimgerler Sırııadan elge oraldy.
2024 jyly naýryzda Qazaqstannyń alǵashqy ulttyq bitimgerlik kontıngenti (139 áskerı qyzmetker) BUU mıssııasy aıasynda Golan jotalaryna jiberilgen edi.
Eske sala ketsek, byltyr qarasha aıynyń sońynda Sırııanyń qarýly toptary úkimettik kúshterge qarsy qýatty shabýylyn bastaǵan edi. Sırııadaǵy qarýly qaqtyǵysty saıası jolmen sheshýge baǵyttalǵan Astana kelisimi buzylyp, Taıaý Shyǵystan taǵy da maza ketti.
30 qarasha kúni olar Sırııadaǵy kólemi jaǵynan ekinshi orynda turǵan Aleppo qalasynyń basym bóligin baqylaýǵa alsa, 6 jeltoqsanda – Sırııanyń tórtinshi úlken qalasy Hamany basyp aldy.
Sırııanyń qarýly oppozıtsııasy el astanasy Damaskini jaýlap alǵanyn, al prezıdent Bashar Asad elden qashqanyn málimdedi.