Sırııadaǵy parlamenttik saılaýdyń qorytyndysy jarııalandy
ASTANA. KAZINFORM – Sırııada ótken jyldyń aıaǵynda Bashar Asad bılikten ketkennen keıin ótkizilgen alǵashqy parlamenttik saılaýdyń qorytyndysy jarııalandy, dep habarlaıdy VVS.
Janama saılaý barysynda Halyq jınalysynyń barlyq 210 múshesi saılanady – saılaý alqalary úshten ekisin (140 múshe) tańdaıdy, al qalǵan múshelerdi ýaqytsha prezıdent Ahmed ash-Sharaa taǵaıyndaıdy.
Bılik qaýipsizdik pen saıası sebepterdi alǵa tartyp úsh provıntsııa, sonyń ishinde kúrdter baqylaýyndaǵy Rakka men Hassakede, sondaı-aq úkimet kúshteri men drýz jasaqtary arasyndaǵy qandy qaqtyǵys bolǵan Sýveıdada daýys berýdi keıinge qaldyrdy.
Aqyry demalys kúngi daýys berý kezinde parlamenttiń 119 depýtaty saılanyp, Halyq jınalysyndaǵy 21 oryn bos qaldy. Sırııa basshysy osy aptada taǵy 70 músheni taǵaıyndaýdy josparlap otyr.
Jańa parlament quramyna alty áıel kirdi. Jergilikti saılaý komıssııasy buǵan deıin 1500-den astam kandıdattyń 14 paıyzyn áıelder quraıtynyn málimdegen.
On oryndy dinı jáne etnıkalyq azshylyqtardyń ókilderi aldy – olardyń arasynda kúrdter, hrıstıandar jáne eki alavıt bar.
Saılaý komıssııasynyń ókili Navar Nedjmeniń baspasóz máslıhatynda saılanǵan 119 músheniń tek 4 paıyzy ǵana áıelder ekenin málimdep, bul san «Sırııa qoǵamyndaǵy áıelderdiń mártebesin jáne olardyń saıası, ekonomıkalyq jáne áleýmettik ómirdegi rólin kórsetpeıtinin» atap ótti.
Ol sondaı-aq jeńimpazdar arasynda tek eki hrıstıan bolǵanyn aıtyp, «Sırııadaǵy hrıstıandardyń úlesin eskere otyryp, olardyń ókildigin álsiz» dep atady.
Nedjmeniń aıtýynsha, Sırııa basshysy taǵaıyndaýy tıis kandıdat sırııalyq qoǵamnyń belgili bir bóliginiń jetkiliksiz ókildiginiń ornyn toltyrýy múmkin, biraq ol parlamentshilerge arnalǵan kez kelgen kvota júıesin joqqa shyǵardy.
Parlamenttiń jańa quramy turaqty konstıtýtsııa qabyldanyp, jalpyhalyqtyq saılaý ótkizilgenge deıin qyzmet etedi dep shamalanyp otyr.
Buǵan deıin Sırııada Bashar Asad bılikten ketkennen keıingi alǵashqy parlamenttik saılaý ótkenin habarlaǵan bolatynbyz.
Sondaı-aq Sırııa soty burynǵy prezıdent Bashar Asadty qamaýǵa alýǵa order bergenin jazdyq.