Sırııadaǵy Islam memleketi shabýyly kezinde qaýipsizdik kúshteriniń tórt qyzmetshisi qaza tapty

ASTANA. KAZINFORM – Lańkestik toptyń Sırııanyń soltústigindegi belsendiliginiń artýynan úkimet kúshteriniń arasynda adamdar qurban boldy, dep habarlaıdy Kazinform menshikti tilshisi.

Sırııanyń Іshki qaýipsizdik kúshteriniń tórt qyzmetkeri eldiń soltústigindegi Rakka qalasynyń As-Sabahııa baqylaý-ótkizý pýnktine «Islam memleketi» (Qazaqstanda tyıym salynǵan uıym – red.) sodyrlarynyń shabýyly saldarynan qaza tapty. Bul týraly SANA aqparat agenttigi Sırııa Іshki ister mınıstrliginiń málimdemesine silteme jasaı otyryp habarlady.

Shabýyldy toıtarý kezinde shabýyldaýshylardyń biri qaza taýyp, taǵy eki qyzmetker jaraqat aldy. Qazirgi ýaqytta bólimsheler uıymnyń qalǵan múshelerin anyqtaý jáne zalalsyzdandyrý úshin jaqyn mańdaǵy aýdandarda izdeý operatsııasyn júrgizip jatyr.

Vedomstvo málimetinshe, shabýyl qalanyń batys bóligindegi qaýipsizdik beketteriniń birine jasalǵan.

Sırııa ІІM atap ótýinshe, bul sońǵy 48 saǵat ishinde Rakkadaǵy qaýipsizdik kúshterine jasalǵan ekinshi shabýyl. Bir kún buryn bul nysanǵa osyǵan uqsas shabýyl jasalyp, sonyń barysynda sodyrlardyń biri joıyldy.

SANA agenttiginiń qaýipsizdik qurylymdaryndaǵy derekkózge silteme jasap habarlaýynsha, shabýyl úshin jaýapkershilik IM uıymyna júktelgen.

Toptyń ózi sońǵy shabýylǵa qatysy baryn ázirge málimdegen joq.

Reuters agenttiginiń habarlaýynsha, bul Damaskidegi bılik aýysqannan beri IM-nyń úkimet kúshterine qarsy jasaǵan eń joıqyn shabýyly bolýy múmkin. Shabýyldan eki kún buryn top Sırııa úkimetine qarsy «operatsııalardyń jańa kezeńi» bastalǵanyn jarııalady.

Senbi kúni IM eldiń soltústik jáne shyǵys aýdandarynda áskerı qyzmetshilerge jasalǵan eki shabýyl týraly málimdep, saldarynan bir sarbaz ben bir beıbit turǵynnyń qaza tapqanyn habarlady.

Buǵan deıin úkimet kúshteri buryn kúrd qurylymdary basqarǵan Rakka qalasyn baqylaýyna alǵan bolatyn. Sırııanyń soltústigi men shyǵysyndaǵy jaǵdaı ekstremıstik uıymnyń jasyryn toptary belsendiliginiń jalǵasýyna baılanysty shıelenisken kúıinde qalyp otyr.

Sondaı-aq belgisiz qarýly adamdar Deır-ez-Zor provıntsııasyndaǵy Maıadın qalasyndaǵy armııa shtabyna shabýyl jasap, bir sarbazdy óltirgeni málim boldy. Ázirge eshbir top shabýyl úshin jaýapkershilikti moınyna alǵan joq.

Osyǵan deıin Sırııa arnaıy qyzmeti Ahmad ash-Sharaaǵa baǵyttalǵan eki qastandyqtyń aldyn alǵanyn habarladyq.

Sondaı-aq Sırııa prezıdentiniń jalpy raqymshylyq týraly jarlyq shyǵarǵanyn jazdyq.