Sırııadaǵy áskerı nysanda qýatty jarylystar boldy
ASTANA. KAZINFORM — Alepponyń ońtústik-batysynda ornalasqan Ál-Hadaba aýdanyndaǵy Sırııa armııasyna tıesili áskerı nysanda qýatty jarylystar boldy, dep habarlaıdy Anadolu.
Sırııanyń resmı SANA aqparat agenttiginiń habarlaýynsha, Ál-Hadaba aýdanyndaǵy áskerı nysanda bolǵan jarylystardan ázirge tórt adam jaraqat alǵany belgili.
Habarlamada bılik jarylystardyń kózi men sebebin anyqtaý úshin tergeý bastaǵany aıtylady.
Aleppo tótenshe jaǵdaılar jáne apat saldaryn joıý jedel basqarmasynyń dırektory Feısal Muhammed Álı jarylystardyń jalǵasýyna baılanysty qutqarý toptary men jedel járdem ókilderi bastapqyda aımaqqa kirýde qıyndyqtarǵa tap bolǵanyn málimdedi.
Aımaqqa kire alǵan Azamattyq qorǵanys qyzmetkerleri jaralanǵan 4 adamdy qutqarǵan. Beıbit turǵyndardyń qaýipsizdigin qamtamasyz etý jáne evakýatsııa jumystaryn jeńildetý úshin jaqyn mańdaǵy úılerdiń turǵyndary evakýatsııalandy, al aımaqqa aparatyn joldar kólik qozǵalysy úshin jabyldy.
Buǵan deıin Sırııanyń resmı Ál-Ihbarııa telearnasy aımaqta qýatty jarylystar bolǵanyn habarlap, olardyń sıpatyn tergeýdi bastaǵan bolatyn.
Eske sala keteıik, buǵan deıin Sırııa túrmesiniń burynǵy basshysy AQSh-ta 60 jylǵa sottalǵanyn habarlaǵan edik.
Nurlan Tuıaqov
