Sırııada júrip jatqan azamat soǵysy 191 000 adamnyń ómirin jalmady
ALMATY. QazAqparat - Sırııada júrip jatqan azamat soǵysy saldarynan 2011 jyldyń naýryzy men 2014 jyldyń sáýiri aralyǵynda 191 000 myń adam qaza tapqan. Bul týraly BUU uıymynyń Adam quqyǵy boıynsha basqarmasynyń baıandamasynda jarııa etildi.
Bul baıandama Sırııa Úkimitine ár túrli aqparat kózderinen kelip túsken derekterge negizdelgen. Alaıda, BUU Adam quqyǵy boıynsha Joǵary komıssary Navı Pılleıdyń aıtýynsha, qaza bolǵandar sany budan da kóp bolýy múmkin.
«Bul jerde álemdik qoǵamdastyqtyń Sırııadaǵy azamat soǵysyn toqtaýda dármensizdik tanytýy, qylmyskerlerdi budan beter aýyr qylmystar jasaýǵa ıtermeleıdi», - delingen baıandamada.
«Joǵarǵy komıssar álemdik qoǵamdastyqtyń Sırııadaǵy qantógisterge jetkilikti kóńil bólmeı jatqandyǵyna qatty qynjylys bildiredi, - dedi óz sózinde BUU Adam quqyǵy boıynsha Basqarmasynyń baspasóz hatshysy Rýpert Kolvıll. - Osylaısha «jigerdiń qum bolýy» Sırııa jerinde qan tógip, azaptaýshylyq qylmystar jasap júrgen qylmyskerlerge oń áser etedi. Olar ózderin emin-erkin sezinedi. Sırııadaǵy áskerı qylmystar men adamzatqa qarsy jasalyp jatqan qylmystar týraly derekter qolynda bola tura, BUU Qaýipsizdik Keńesi «Sırııa isin» Halyqaralyq qylmystyq sotqa bermeı otyr».
BUU derekteri boıynsha, Sırııadaǵy azamat soǵysy saldarynan kúni búginge deıin 9 myńǵa jýyq jasóspirimniń ómiri qyrshynnan qıyldy. Olardyń ishinde 2 myńnan astam bala - 10 jasqa tolmaǵandar.
BUU Bas hatshysy Pan Gı Mýn álemdik qoǵamdastyqty Sırııadaǵy azamat soǵysyn toqtatýǵa kómektesýge shaqyrdy. Óıtkeni bul qantógis búkil Taıaý Shyǵys aımaǵyna keri áser etýde.
