Sırııada jaǵdaı qaıtadan ýshyǵyp barady: kim kimmen soǵysyp jatyr
ASTANA. KAZINFORM – Sırııanyń birqatar qalasynda jaǵdaı shıelenisip, túrli toptar arasynda qaqtyǵystar júrip jatyr. Olardyń ishinde ásirese Djabla qalasynda kóp qan tógilýde. Sırııadaǵy jaǵdaı jóninde Kazinform agenttigi tilshisiniń materıalynan oqyńyzdar.
Djablada Bashar Asad pen onyń otbasyna jaqyn bolyp tabylatyn alavıtter turady.
Sırııanyń jaǵalaýǵa jaqyn Latakııa men Tartýs sııaqty óńirleri jańa úkimet pen búgingi tańda eldiń jańa ákimshiligi sanalatyn «Haııat Tahrır ash-Sham» (HTSh) tobyna qarsy túrli qarýly birlestikter arasyndaǵy iri qaqtyǵystardyń aımaǵyna aınalyp otyr.
Búgin tún sırııalyqtardyń úreıin týdyrdy
Sırııanyń jańa ákimshiligi kúsh-qýat qurylymdarynyń Tartýstaǵy alavıtterdiń burynǵy rejımmen baılanysy bar degen sebeppen jergilikti azamattardyń tutqyndalýyna qarsy narazylyǵyn basýǵa degen umtylysy turǵyndardyń jappaı tártip buzýyna alyp keldi, onyń arty Latakııa, Tartýs jáne Djabla qalalarynda alavıtter men jańa ákimshiliktiń kúsh qurylymdary arasyndaǵy qaqtyǵysqa ulasty.
«Haııat Tahrır ash-Sham» uıymyna qarsy áskerı birlestikter bir mezette olardyń Latakııa, Tartýs jáne Homstegi ákimshilikterine shabýyldady. Sırııanyń Ulybrıtanııada ornalasqan Adam quqyqtary jónindegi observatorııasynyń (SOHR) málimetterine sáıkes, qaqtyǵystardyń saldarynan keminde 70 adam qaza bolǵan. Asad ákimshiligi áýe barlaýynyń bastyǵy general-maıor Ibragım Hýveıdja kepilge alyndy.
Sırııanyń qaýipsizdik kúshteri keshe eldiń batysynda Bashar Asad kezindegi arnaıy maqsattaǵy bólimshe komandıri Sýhel ál-Hasanmen baılanysty qarýly toptarmen soǵysqa qatysqandaryn málimdedi.
Narazylyqtardy basý jáne Jerorta teńizi aýdanyna baqylaýdy qaıtarý úshin Sırııa bıligi óńirge Qorǵanys mınıstrliginiń qosymsha kúshterin jumyldyrǵan.
Bul rette Latakııaǵa sapary barysynda áskerı kolonnany partızandar otrıady ońdyrmaı atqylaǵan.
Bul Sırııa jańa úkimetiniń 2024 jyldyń jeltoqsanynda bılik basyna kelgeli bergi eń qanquıly qaqtyǵystarynyń biri boldy.
Shabýyldardyń saldarynan Sırııanyń ulttyq áskeriniń 50-den astam sarbazy mert boldy. Qazirgi tańda óńirge eldiń Qorǵanys mınıstrliginiń 17 myńǵa jýyq áskeri keldi. Olar alavıtter men ózge de qarýly qurylymdardyń narazylyǵyn basýǵa jumyldyryldy.
Keıbir sholýshylar ásker qalanyń keı jerlerin beı-bereket atqylap jatqanyn jetkizdi. Osynyń saldarynan olardyń esebi boıynsha, beıbit turǵyndardy qosa alǵanda 120-dan astam adam qaza bolǵan. Asadty jaqtaýshylar atalǵan jaǵdaıdy ulttyq azshylyqtarǵa jasalǵan kúsh kórsetý áreketi etip kórsetýge umtylyp jatyr.
Burynyraq alavıt belsendileri burynǵy rejımniń buǵyp jatqan uıymdary bar ekeni, olar turǵyndardy jappaı tártipsizdikterge ıtermeleeıtini týraly málimdegen edi.
Sırııadaǵy jaǵdaıdyń ýshyǵýy aıasynda aýyr brondy tehnıkadan turatyn túrik qarýly kúshteriniń áskerı kolonnasy Idlıb qalasyna bet alǵan.
Sholýshylar Túrkııanyń «Sırııa demokratııalyq kúshterine» qarsy toptarǵa kezekti áskerı operatsııa bastaýy múmkindigin joqqa shyǵarmaıdy.
Osylaısha, Sırııa bıligi áleýmettik, saıası jáne ekonomıkalyq problemalarmen qatar ulttyq azshylyqtar narazylyǵynan týyndaǵan ishki qarama-qaıshylyqtarmen betpe-bet kelip otyr.
Sarapshylardyń baǵalaýynsha, eldegi narazylyqtardy basýǵa Damsk ákimshiliginiń kúshi jetpeýi múmkin. Óıtkeni olarǵa óńirlerdegi túrli kúshter qoldaý kórsetip otyrýy yqtımal.
Jalpy alǵanda, Sırııadaǵy jaǵdaı etnıkalyq narazylyqtardy qosa alǵanda kún ótken saıyn shıelenisip barady. Mundaı ishki qaıshylyqtar men qarýly qaqtyǵystar bolashaqta eldegi turaqsyzdyqty odan saıyn soza túsýi múmkin.
Qazirgi tańda Sırııanyń Tartýs pen Latakııa qalalarynda saǵat keshki 22:00-den saǵat 10:00-ge deıin, Homsta saǵat 22:00-den, 08:00-ge deıin komendanttyq saǵat engizildi.
Osyǵan deıin biz Sırııanyń ýaqytsha prezıdenti eldiń aýmaqtyq tutastyǵyn saqtaýǵa shaqyrǵany týraly jazǵan edik.