Sırııada ulttyq birlik ýaqyty keldi — Fıdan

ASTANA. KAZINFORM — Túrkııa Sırııadaǵy kúrd jasaqtaryn ıntegratsııaǵa shaqyryp, odan ári shıelenisý eldi bólshekteýge umtylǵan kúshterge tıimdi ekenin aıtady, dep habarlaıdy agenttiktiń menshikti tilshisi.

Túrkııanyń Syrtqy ister mınıstri Hakan Fıdan Sırııanyń Aleppo qalasyndaǵy sońǵy oqıǵalarǵa túsinikteme bere otyryp, bolyp jatqan oqıǵalar Ankaranyń sońǵy jyly aıtylǵan eskertýlerin rastaıtynyn málimdedi. 

Onyń aıtýynsha, eger Kúrdistan jumysshy partııasy (Qazaqstanda tyıym salynǵan — red.) men onyń Sırııadaǵy bólimshesi, «Sırııa demokratııalyq kúshteri» (SDF) degen atpen áreket etetin «Halyq qorǵaý bólimderi» (YPG) kesheýildetý taktıkasynan bas tartyp, Sırııa memleketine ıntegratsııalaný protsesin bastasa, qazirgi oqıǵalardyń aldyn alýǵa bolar edi.

Fıdan KJP/YPG-niń aýmaqtardaǵy baqylaýdy saqtap qalý jáne óz múddelerin qandaı baǵa bolsa da alǵa jyljytý nıetiniń Sırııaǵa da, jalpy aımaqqa da paıda ákelmeıtinin atap ótti. Ol Sırııa úkimeti negizinen óz kúshin qalpyna keltirip, lańkestikke qarsy áleýetin kúsheıtip, halyqqa negizgi memlekettik qyzmetterdi kórsete bastaǵanyn aıtty.

— Qazir Sırııada ulttyq birlik ýaqyty keldi. SDF óz jaýapkershiligin oryndaýy kerek, — dedi Túrkııanyń Syrtqy ister mınıstri.

Ol onyń ornyna qurylym Izraılmen kelise otyryp áreket etedi jáne aımaqta júrgizilip jatqan «bólý jáne jeńý» saıasatynyń quralyna aınalady dep málimdeıdi.

Osyǵan deıin Aleppoda Sırııa úkimeti men kúrd kúshteri arasyndaǵy qaqtyǵys kúsheıgenin jazdyq.