Sırııada tikushaq qulap, AQSh-tyń 22 áskerı qyzmetkeri zardap shekti

AMMAN. QazAqparat – Sırııanyń soltústik-shyǵysynda tikushaq apatynan AQSh-tyń 22 áskerı qyzmetkeri jaraqat aldy, dep habarlaıdy QazAqparat tilshisi AQSh Qarýly kúshteri Ortalyq qolbasshylyǵyna silteme jasap.

Apat jeksenbi kúni bolǵan, biraq amerıkalyq áskerıler oqıǵa týraly dúısenbiniń keshinde habarlady. Oǵan ne sebep bolǵany jáne jaraqattyń aýyr-jeńildigi naqtylanǵan joq.

Ár túrli dárejede jaraqat alǵan 22 adamnyń 10-y «CENTCOM jaýapkershilik aımaǵynan tys joǵary deńgeıdegi kómek kórsetetin mekemelerge evakýatsııalandy», - delingen habarlamada.

CENTCOM qarsylas taraptyń atysy týraly habarlanbaǵanyn málimdep, oqıǵanyń sebebi tergelip jatqanyn aıtty.

AQSh Sırııadaǵy «Islam memleketi» kúshterimen kúres júrgizip otyrǵan halyqaralyq koalıtsııany basqarady. Arab Respýblıkasyndaǵy amerıkalyq qarýly kontıngent qatary 900 adamǵa jýyq.

CENTCOM – AQSh Qorǵanys mınıstrliginiń on bir birikken jaýyngerlik qolbasshylyǵynyń biri. Ol Taıaý Shyǵys, Shyǵys Afrıka jáne Ortalyq Azııa aımaqtarynda soǵys qımyldary jaǵdaıynda amerıkalyq áskerdiń operatsııalaryn josparlaý men basqarýǵa jaýapty. Negizgi shtab Florıda shtatynyń Tampa qalasyndaǵy áýe bazasynda ornalasqan.

Foto: AP Photo/Darko Bandic