Sırııada saılaý naýqany bastaldy

ASTANA. KAZINFORM — Sırııa Halyq májilisiniń Joǵarǵy saılaý komıteti eldiń keıbir provıntsııasynda Halyq májilisiniń músheleri saılaýyna kandıdattar tizimin jarııalap, saılaý naýqanynyń bastalǵanyn habarlady. Bul týraly Anadoly jazdy.

Joǵarǵy saılaý komıssııasynyń tóraǵasy Muhammed Taha ál-Ahmed Sırııanyń SANA aqparat agenttigine bergen málimdemesinde, 28 qyrkúıekte el boıynsha 50 saılaý okrýginde Halyq májilisine qatysýǵa ótinish qabyldaý protsesi aıaqtalǵanyn aıtty.

Ál-Ahmed jarııalanǵan tizimde kandıdattardyń jalpy sany 1578 adam ekenin, olardyń 14%-y áıelder ekenin jáne bul kórsetkish provıntsııalarǵa qaraı ártúrli ekenin atap ótti.

Onyń sózinshe, saılaý naýqany 29 qyrkúıekte bastalyp, 3 qazan kúni aıaqtalady.

Saılaý 5 qazan kúni ótip, ókildik prıntsıpine negizdelgen saılaý komıssııalary kómegimen júrgiziledi.

Ál-Ahmedtiń habarlaýynsha, daýys berý 5 qazan, jeksenbi kúni saǵat 09:00-de bastalyp, daýystardy sanaý saǵat 16:00-de bastalady.

Sırııada azamattyq soǵys saldarynan bolǵan qıraýlar, jeke kýálikterdiń joqtyǵy, mekenjaılardyń joıylýy jáne halyqtyń jartysynan astamynyń el ishinde jáne syrtynda qonys aýdarýy sebebinen Halyq májilisiniń saılaýy tikeleı halyqtyq daýys berý arqyly emes, ókildik prıntsıpine negizdelgen saılaý komıssııalary arqyly ótkiziledi.

2011 jylǵy halyq sany týraly derekterge sáıkes, provıntsııalardy ókildeıtin 210 depýtat kandıdattarynyń 140-y saılaý komıssııalary arqyly saılanady, al qalǵan depýtattar Prezıdenttiń taǵaıyndaýymen bekitiledi.

Budan buryn Sırııa Bashar Asad qulatylǵannan keıin alǵashqy parlamentin qurýǵa daıyndalyp jatqanyn jazǵanbyz.