Sırııada kúıeýi qaıtys bolǵan qazaqstandyq áıelder kómek surap júgingen joq - SІM
ASTANA. QazAqparat - Sırııada kúıeýleri qaıtys bolǵan qazaqstandyq áıelder kómek surap júgingen joq. Bul týraly búgin QR Syrtqy ister mınıstrligi baspasóz qyzmetiniń jetekshisi Aıbek Smadııarov aıtty, dep habarlaıdy QazAqparat tilshisi.
«Sırııada kúıeýleri qaıtys bolǵan Qazaqstan azamatshalary balalarymen sol jaqta qalyp qoıdy» degen aqparattan habardarmyz. Bul másele boıynsha búgingi kúnge deıin Syrtqy ister mınıstrliginiń atyna olardyń týystarynan ne bolmasa ózderinen birde-bir aryz, shaǵym kelip túsken joq. Sondyqtan, bul aqparatty tıisinshe quziretti organdarmen birge tekserip jatyrmyz. Eger olar bizge júginetin bolsa, onda qaı jerde bolsa da, árbir Qazaqstan azamatyn mindetti túrde qutqarýǵa daıynbyz», - dedi SІM ókili.
Aıta keteıik, buǵan deıin QR Syrtqy ister mınıstrligi Konsýldyq qyzmet departamentiniń dırektory Ardaq Madıev áskerı qaqtyǵystarda qaıtys bolǵan qazaqstandyqtar az emestigin, olardyń balalary bosqyndar lagerinde qalǵanyn aıtqan bolatyn.
