Sırııada kindigi kesilmegen náreste úıindi astynan qutqaryldy

DAMASK. QazAqparat – Sırııanyń soltústigindegi úıindilerdiń arasynan jańa týǵan qyz bala qutqaryldy, dep habarlaıdy QazAqparat CNN-ge silteme jasap.

Náreste tabylǵanda onyń kindigi de kesilip úlgermegen edi. Qasyndaǵy anasy qıraǵan úıindi arasynda kóz jumǵan.

«Úıindilerdi qazyp jatqanda, daýys estidik jáne kindigi kesilmegen sábıdi taptyq. Kindigin ózimiz kestik, nemere qaryndasym qyzdy aýrýhanaǵa apardy», - dedi anasynyń nemere aǵasy Halıl Ál-Sývadı AFP agenttigine.

Qutqarylǵan náreste qazir Afrın qalasyndaǵy balalar aýrýhanasynda jatyr. Dárigerler onyń jaǵdaıy turaqty ekenin aıtýda, biraq onyń denesi kógergen, jaraqat alǵan jáne denesi sýyp qalǵan.

Sábıdiń otbasynan eshkim tiri qalmady. Olar turǵan bes qabatty úıde jermen-jeksen bolǵan.

Sonymen birge, sırııalyq qutqarýshylar tutas otbasy múshelerin úıindi astynan alyp shyqty. Ondaǵy balalar eki beton plıtanyń arasynda 36 saǵat boıy kómek kútken. Márııam esimdi qyz qutqarýshylar kelgenshe inisin qolymen jaýyp, múmkindiginshe qorǵaǵan. Qazir balalar aýrýhanaǵa jetkizilip, medıtsınalyq kómek kórsetilip jatyr.

Aıta keteıik, Sırııanyń túrli aımaqtarynda eki joıqyn jer silkinisi qurbandarynyń sany 2802-ge deıin ósti. Zardap shekkenderdiń sany – 5 035.