Sırııada Qazaqstannyń qansha azamaty júr
«Gýmanıtarlyq operatsııa boıynsha Qazaqstanda 6 er adam, 11 áıel, 30 bala qaıtaryldy. Olardyń keıbirin azamattyǵynyn aıyrý máselesi týrasynda suraqqa keler bolsaq, ıá, bizdiń Prezıdenttiń bastamasymen bul norma zańnamalyq turǵyda bekitilgen bolatyn. Qazirgi tańda qaqtyǵys aımaqtarynan kelgen azamattarǵa qatysty bul shara qarastyrylyp jatyr. Bálkim, keıin sot sheshimi boıynsha júzege asýy da múmkin. Biraq, bul rette jaǵdaıdyń múlde bólek ekenin aıta ketý kerek. Bul adamdar ózdigimen elge oralýǵa nıet bildirgen. Kináli dep tanylǵandar Qazaqstanda jazaǵa tartylady. Kinásizder týraly álbette, shara qoldaný qarastyrylmaıdy», - dedi Baqytbek Rahymberdıev.
UKQ departament basshysynyń aıtýyna qaraǵanda, Sırııada qazirgi tańda 370-380-ge tarta Qazaqstan azamatty áli de bar.
«Olardyń basym kópshiligi áıelder. Olarmen birge 400-500 kishkentaı bala bar», - dedi Baqytbek Rahymberdıev.
Eske sala ketsek, keshe Memleket basshysy Nursultan Nazarbaev Sırııadan Qazaqstan azamattaryn evakýatsııalaý boıynsha gýmanıtarlyq operatsııaǵa baılanysty málimdeme jasaǵan bolatyn. Memleket basshysy atap ótkendeı, 6 qańtarda quqyq qorǵaý organdary men Syrtqy ister mınıstrligi júrgizgen gýmanıtarlyq shara nátıjesinde Sırııadan Qazaqstannyń 47 azamaty, sonyń ishinde 30 bala elge qaıtaryldy.
Sonymen birge, búgingi baspasóz máslıhatynda QR Syrtqy ister vıtse-mınıstri Erjan Ashyqbaev «Jýsan» operatsııasynan keıin de qaqtyǵys aımaqtarynda júrgen qazaqstandyqtardy Otanyna qaıtarý jumystary jalǵasatynyn málim etken bolatyn.
