Sırııada qalǵan Qazaqstan azamattarynyń sany naqtylandy
«Qazirgi kezde Sırııada 300-ge tarta Qazaqstan azamaty qaldy. Olardyń arasynda erler men áıelder jáne balalar bar. Sońǵy 2-3 jylda Sırııaǵa el azamattarynyń barýy úrdisi joq», - dedi B. Rahymberdıev.
Belgili bolǵandaı, búginde Sırııada shamamen 150-170 bala qalyp otyr.
Sonymen qatar ol atalǵan elden Qazaqstan azamattaryn qaıtarý boıynsha aldaǵy sharalarǵa toqtaldy.
«Ekstradıtsııa, deportatsııa máselesi osy jyly tolyǵymen aıaqtalady degen úmitimiz bar. Olardyń basym kópshiligin elimizge alyp kelemiz dep josparlap otyrmyz. Bul baǵyttaǵy qıyndyqtarǵa toqtalsaq, Sırııany birneshe qarýly toptar basyp alǵan. Bir jerlerde úkimettiń zańdary oryndalsa, al keıbir óńirlerde zańnamalyq negiz saqtalmaǵan. Osy oraıda bul toptarmen kelisimge kelý men bizdiń azamattardy sol jerden alyp shyǵý qıyndyq týdyrady. Biz óz erkimen elge keletinderdi qaıtaramyz. Olardyń kóbisi Qazaqstanǵa oralýǵa shyn nıetterin bildirip otyr. Kelemiz degen adamdardy 7 jáne 9 mamyr kúni qaıtardyq. Al endi qalǵan adamdarmen qosymsha jumystar júrgiziledi», - dedi Baqytbek Rahymberdıev.
Budan buryn habarlanǵandaı, jaqynda Sırııadan 231 Qazaqstan azamatynyń elge jetkizilýine baılanysty QR Prezıdenti Qasym-Jomart Toqaev málimdeme jasady.
«Meniń tapsyrmam boıynsha 7 jáne 9 mamyr kúnderi Sırııadan 231 Qazaqstan azamaty elge jetkizildi, onyń 156-sy - balalar, deni mektep jasyna deıingiler, sonyń ishinde 18-i - jetim balalar. Bul aýqymdy gýmanıtarlyq aktsııa - Tuńǵysh Prezıdent - Elbasy Nursultan Nazarbaevtyń tapsyrmasymen bıyl qańtar aıynda júrgizilgen «Jýsan» operatsııasynyń jalǵasy», - delingen Memleket basshysynyń málimdemesinde.
Belgili bolǵandaı, Qazaqstanǵa kelgennen keıin 16 er adam men 4 áıel DAISh jaǵynda terrorıstik is-áreketke qatysy bar degen kúdikpen tutqynǵa alyndy.
