Sırııada etnıkalyq qaqtyǵystardyń saldarynan 30 adam mert boldy

ASTANA. KAZINFORM – Es-Sýveıdada qarýly arab taıpalary men taýlyq drýzdardyń qorǵanys kúshteriniń arasyndaǵy qarýly qaqtyǵys saldarynan 30 adam mert bolyp, 100-den astam adam jaraqat aldy. Bul týraly arab memleketi ótpeli úkimeti ishki ister mınıstrliginiń Al Watan basymylynda jarııalanǵan málimdemesinde aıtylǵan, dep jazady reseılik TASS.

Osyǵan deıin 13 adamnyń mert bolyp, 40 adam jaraqat alǵany týraly habarlanǵan.

- Zorlyq-zombylyqtyń órshýi óńirdegi qaýipsizdik baǵytyndaǵy jumystardyń beı-berekettigi men jergilikti ákimshiliktiń problemalardy retteı almaýynyń nátıjesi boldy, - delingen habarlamada.

-Osy sebepti Sırııa bıligi eldiń ońtústigine jaǵdaıdy turaqtandyrý úshin qaýipsizdik kúshteriniń arnaıy bólimshelerin jiberdi. Sırııanyń Іshki ister mınıstrligi Es-Sýveıda halqyn qaqtyǵysty tez arada toqtatý, zańdylyq pen tártipti qalpyna keltirý úshin bılikpen yntymaqtasýǵa shaqyrdy.

Buǵan deıin drýz qoǵamdastyǵynyń sheıhteri eki bala qaza bolǵan shabýyldardy aıyptap, beıbitshilikti saqtaý úshin atysty toqtatýdy talap etti. Al Mayadeen telearnasy taratqan málimdemede olar Sırııanyń ýaqytsha úkimeti qarýlanǵan bandylardyń shabýyldaryn toqtatyp, Damask – Es-Sýveıda tas jolyndaǵy qaýipsizdikti qamtamasyz etýi kerek ekenin habarlady.

Drýzdar — Sırııa, Lıvan, Izraıl jáne Iordanııada turatyn, arab tilinde sóıleıtin, oqshaýlanǵan etnokonfessııalyq top. Sırııada 700 myńǵa jýyq drýz bar, bul — sany jaǵynan kúrdter men alavıtterden keıingi úshinshi dinı-etnıkalyq azshylyq. 1 mamyrda Djaramane men Sahnada drýzdar turatyn aımaqtarda atysty toqtatý jóninde kelisim jasaldy. Qaqtyǵystar barysynda qaýipsizdik kúshteriniń 20 qyzmetkeri qaza tapty.

Osyǵan deıin AQSh-tyń Sırııaǵa qarsy sanktsııalardy toqtatatyny týraly jazdyq.