Sırııada birneshe dúrkin jarylys bolyp, 120-dan astam adam qaza tapty
ASTANA. QazAqparat - Sırııalyq Djabla jáne Tartýs qalalaryndaǵy Reseıdiń áskerı bazalary mańyndaǵy jarylystar saldarynan kóz jumǵandardyń sany 120-dan asty. Bul týraly bazasy Londonda ornalasqan adam quqyqtaryn baqylaý boıynsha sırııalyq ortalyq habarlady.
Buǵan deıin jergilikti BAQ habarlaǵandaı, eki qalada jarylystar saldarynan 78 adam qaza tapqan delingen.
Sırııalyq memlekettik telearnalardyń aqparatynsha Djeblede tańerteń avtovokzalda úsh jarylys boldy. Keıin jankeshti jergilikti gospıtalge kirer jerde óz-ózin jardy.
Sondaı-aq, Tartýs qalasyndaǵy avtovokzalda mınalanǵan avtomobıl jaryldy. Eki jankeshti vokzal ishine kirip, jarylǵysh zatyn iske qosty.
