Sırııada Bashar Asadtyń inisine tıesili jerasty týnnelderi tabyldy
ASTANA. KAZINFORM — Sırııa astanasy Damaskide bılikten qýylǵan Bashar Asadtyń inisi Maher Asadtyń jazǵy rezıdentsııasynyń astynan seıfter men brondalǵan bólmeleri bar týnnelder tabyldy, dep habarlaıdy Kazinform agenttigi Anadolu-ǵa silteme jasap.
Maher Asad Sırııa armııasynyń elıtalyq bólimshesi 4-brondy transporter dıvızııasynyń qolbasshysy boldy. Onyń jazǵy rezıdentsııasy Damask-Beırýt tas jolynyń janynda, astanaǵa qaraıtyn tóbede ornalasqan. Úsh qabatty ǵımarat bıik qabyrǵalarmen qorshalǵan jáne onyń keń aýlasynda tikushaq alańy bar.
Rezıdentsııanyń birinshi qabatynda avtoturaq pen konferents-zal bar, al jertólede týnnelder jelisine aparatyn brondalǵan esik bar.
Esikti ashyp, 22 baspaldaqpen túsý arqyly demalys bólmesine kirýge bolady. Taǵy 130 qadam tómendegennen keıin týnnel jelisine kirý múmkin. Aıta keteıik, elektr symdary, jeldetkish, jatyn bólmeleri, ashana jáne jýynatyn bólmelerimen jabdyqtalǵan týnnelder brondalǵan esiktermen qorǵalǵan. Negizgi týnneldegi keıbir bólmelerden bos seıfter men sándi saǵat sóreleri tabyldy. Týnnelderde áli ashylmaǵan eki brondalǵan esik bar, olardyń artynda ne jatqany áli belgisiz.
Uzyndyǵy shamamen 3 shaqyrym bolatyn týnnelder jelisi qulatylǵan rejım armııasynyń 4-brondy transporter dıvızııasynyń bas shtabyna aparady. Sırııa-Lıvan tas jolyndaǵy kólikterge arnalǵan týnnelderdiń kireberisi de kórinedi.
Keshendegi kúzetshilerdiń biri Faız Muhammadtyń aıtýynsha, Maher Asad ǵımaratty keńse jáne demalys orny retinde paıdalanǵan.
Eske sala keteıik, Erdoǵan men ash-Sharaa Sırııany qalpyna keltirý máselelerin talqylady.