Sırııada Bashar Asad ketkennen keıin alǵash ret parlamenttik saılaý ótedi

ASTANA. KAZINFORM — Daýys berý 15-20 qyrkúıek aralyǵynda ótedi, dep habarlaıdy Kazinform menshikti tilshisi.

Sırııa bıyl qyrkúıekte Bashar Asad rejımi qulaǵannan keıingi alǵashqy parlamenttik saılaýdy ótkizýge nıetti. Bul týraly Joǵarǵy saılaý komıtetiniń tóraǵasy Muhammad Taha ál-Ahmad prezıdent Ahmad ash-Sharaamen kezdesýiniń qorytyndysy boıynsha málimdedi, dep habarlaıdy SANA.

Kezdesý barysynda Sırııa qoǵamy túrli sektorlarynyń ókilderimen keńesý negizinde daıyndalǵan ýaqytsha saılaý zańyna engizilgen negizgi túzetýler talqylandy. Prezıdent ash-Shaara daýys berýdi búkil elde ótkizý qajettigin atap ótip, aýmaqtyq bólinýdiń kez kelgen ıdeıasyn joqqa shyǵaryp, munyń Sırııa halqynyń erkine qaıshy ekenin málimdedi. 

— Saılaý protsesi áskerı qylmyskerlerdi qoldaǵan nemese konfessııaaralyq alaýyzdyqty qozdyrýǵa úles qosqan adamdardy shyǵarýy kerek, — dep atap ótti ál-Ahmad.

Engizilgen túzetýlerge sáıkes, Halyq jınalysyndaǵy (parlament) depýtattardyń jalpy sany 150-den 210-ǵa deıin artady. Onyń 70-in prezıdent taǵaıyndaıdy, al qalǵan 140-y saılanady.

— 70 depýtattyq prezıdent kvotasy joǵary bilikti mamandardy tartýǵa jáne múmkin bolatyn teńgerimsizdikterdiń ornyn toltyrýǵa jumsalady, — dep naqtylady komıtet basshysy. 

Mandattardy provıntsııalar arasynda bólý 2011 jylǵy halyq sanaǵy negizinde júzege asyrylady. Oryndar provıntsııalar arasynda halyq sanyna sáıkes bólinedi jáne jergilikti qaýymdastyq pen zııaly qaýym ókilderi úshin okrýgter boıynsha jikteledi.

Ál-Ahmad túsindirgendeı, qazirgi daýys berý úlgisi ótpeli kezeńniń erekshe jaǵdaılaryna beıimdelgen ashyq jáne fýnktsıonaldy saılaý elementterin biriktiredi. 

Prezıdent ýaqytsha saılaý júıesi týraly jarlyqqa qol qoıǵannan keıin Joǵarǵy saılaý komıtetine kishi komıssııalardy qurý úshin bir apta ýaqyt qajet, sodan keıin olar saılaý organdaryn qurý úshin 15 kún ýaqyt qajet bolady.