Sırııada «Ashý-yza kúni» 60-tan astam adam qaza tapty
ASTANA. 30 sáýir. QazAqparat - Sırııanyń birneshe úlken qalasynda ótken buqaralyq narazylyq sharalardyń barysynda 60-tan astam adam qaza boldy.
Bul týraly Associated Press agenttigi jergilikti quqyq qorǵaýshy uıymdarǵa silteme jasap habarlap otyr. Ázirge bul aqparatty basqa derekkózder qýattaǵan joq, dep habarlaıdy RBK agenttigi.
Keshe Sırııa oppozıtsııasy búkil el boıynsha «Ashý-yza kúni» degen ataýmen narazylyq sharalaryn uıymdastyrǵan bolatyn. Halyqqa úndeý Facebook áleýmettik jelisi arqyly tastalǵan. Narazylyq sherýleriniń oshaǵy eldiń ońtústik-soltústigindegi Deraa qalasynda boldy, Sırııadaǵy úkimetke qarsy alǵashqy sherýler naýryz aıynda osy qalada bastalǵan edi. Ruqsat etilmegen keshegi narazylyq sharalaryn basý úshin, Sırııa ókimeti ol qalaǵa muzdaı qarýlanǵan armııa bólimderin jiberdi.
Sırııanyń úlken qalalarynda osymen birneshe apta boıy oppozıtsııalyq sherýler jalǵasýda. Buqara halyq «Baas» partııasy men onyń basshysy, Sırııa Prezıdenti B.Asadtyń saıası dıktatýrasyna narazylyq bildirýde. El ókimeti oppozıtsııanyń talaptaryn oryndap, sońǵy 48 jyl boıy saqtalyp kelgen tótenshe jaǵdaıdyń kúshin toqtatqan bolatyn. Biraq narazylyq sherýleri toqtamaı tur: halyq qoǵamdyq-saıası ómirdi yryqtandyrýdy, «Baas» partııasynyń bılik basyndaǵy monopolııasyn toqtatýdy talap etýde. Keıbir málimetter boıynsha, halyq tolqýy bastalǵannan beri 500-den astam adam tártipsizdik qurbany bolǵan.
