Sırııada Bashar Asad ketkennen keıingi alǵashqy parlamenttik saılaý aıaqtaldy
ASTANA. KAZINFORM — Sırııada Bashar Asad bılikten ketkennen keıingi alǵashqy parlamenttik saılaý ótti, dep habarlaıdy BBC.
Ótpeli kezeńde zań shyǵarýǵa jaýap beretin QHA-nyń tikeleı saılaýy josparlanbaǵan. Onyń ornyna «saılaý alqalary» 210 parlamentarııdiń úshten ekisin tańdaıdy, qalǵanyn ýaqytsha prezıdent Ahmed ash-Sharaa taǵaıyndaıdy.
Eldi uzaq ýaqyt basqarǵan burynǵy prezıdent Bashar Asadty 13 jylǵa sozylǵan azamattyq soǵystan keıin 2024 jyly jeltoqsanda kóterilisshiler bılikten taıdyrǵan bolatyn.
Daýys berýge Sırııanyń úsh provıntsııasy qatyspady. Olar kúrdter baqylaýyndaǵy Rakka men Hassaka jáne úkimet kúshteri men drýz jasaqtary arasynda qandy qaqtyǵystar bolǵan Sýveıda. Bılik qaýipsizdik maqsatynda bul aýmaqtarda saılaýdy ýaqytsha keıinge qaldyrdy.
Ótken aptada Sırııa prezıdenti Ahmed ash-Sharaa BUU Bas assambleıasynda sóılegen sózinde qantógiske kinálilerdiń barlyǵyn, sondaı-aq Asad tusynda jaýyzdyq jasaǵandardy jaýapqa tartýǵa ýáde bergen bolatyn.
Buǵan deıin Sırııa Halyq májilisiniń Joǵarǵy saılaý komıteti eldiń keıbir provıntsııasynda Halyq májilisiniń músheleri saılaýyna kandıdattar tizimin jarııalap, saılaý naýqanynyń bastalǵanyn habarlaǵan edi.