Sırııa Ulttyq mýzeıine ury tústi

ASTANA. KAZINFORM – Sırııa Ulttyq mýzeıine ury túsip, olar ejelgi músinder men qundy jádigerlerdi úptep ketken. Bul týraly sıngapýrlyq Lianhe Zaobao basylymy habarlady.

Belgili bolǵandaı, Damask qalasynyń ortalyǵynda ornalasqan Ulttyq mýzeıde 10 qarasha kúni keshke qaraı urlyq deregi tirkeldi. Qazir oqıǵa boıynsha tergeý júrgizilip jatyr. Urlanǵan músinderdiń tarıhy ejelgi Rım dáýirine deıin barady.

Mýzeı bergen aqparatqa sáıkes, urylar qylmys kezinde shyny sórelerdi syndyrǵan. Damask qalalyq ishki qaýipsizdik basqarmasynyń ókili tergeý organdarynyń urylardy ustaý jáne qoldy bolǵan eskertkishterdi qaıtarý úshin barlyq sharalardy qabyldaǵanyn málimdedi.
Basylymnyń jazýynsha, mýzeıden alty kóne músin urlanǵan.

1936 jyly irgesi qalanǵan Sırııa Ulttyq mýzeıi arab elderi boıynsha tarıhy eń tereń jáne asa mańyzdy mádenı mekemelerdiń biri.

Sırııada azamattyq soǵys bastalǵannan keıin, mýzeı 2012 jyly jabylǵan edi. 2018 jyly mýzeıdiń bir bóligi qaıta ashylǵan. Al Sırııada bılik aýysqannan keıin, 2025 jyldyń qańtarynda mýzeı jumysy tolyq qalpyna kelgen edi.

Buǵan deıin AQSh prezıdenti Donald Tramptyń Aq úıde Sırııanyń ýaqytsha prezıdenti Ahmed ash-Sharaamen kezdesý ótkizgenin jazǵan edik.