Sırııa úkimeti men kúrdter atysty toqtatý týraly kelisimge qol qoıdy
ASTANA. KAZINFORM – Sırııa bıligi kúrdter men Sırııa demokratııalyq kúshteri bastap, eki aptaǵa sozylǵan atysty aıaqtap, jalpyulttyq atysty toqtatý týraly málimdeme jasady.
Atysty toqtatý týraly kelisim – Sırııa demokratııalyq kúshteriniń Sırııa armııasy men memlekettik mekemelerine ıntegratsııalanýyn kózdeıtin keń aýqymdy 14 tarmaqtan turatyn kelisimniń bóligi.
Sırııa prezıdenti Ahmed ash-Sharaa Damask qalasynda sóılegen sózinde kelisim Sırııanyń memlekettik mekemelerine úsh shyǵys jáne soltústik provıntsııa – Hasaka, Deır-ez-Zor jáne Rakkany baqylaýǵa alýyn qalpyna keltirýge múmkindik beretinin málimdedi.
BBC jazýynsha, ash-Sharaa men Sırııa demokratııalyq kúshteriniń qolbasshysy Mazlým Abdı arasynda qol qoıylǵan kelisimge sáıkes Sırııa bıligi azamattyq mekemelerdi, shekara ótkelderin jáne munaı-gaz ken oryndaryn basqarýdy óz qolyna alady.
Sırııa demokratııalyq kúshteriniń áskerı jáne qaýipsizdik qyzmetkerleri Sırııanyń Qorǵanys jáne Іshki ister mınıstrlikterine biriktiriledi, al Damask ondaǵan myń «Islam memleketi» (IM, Qazaqstanda tyıym salynǵan uıym – red.) sheteldik sodyrlaryn ustap otyrǵan túrmeler men lagerler úshin jaýapkershilikti óz moınyna alady.
2024 jyldyń jeltoqsanynda avtokrat Bashar Asad bılikten qulatylǵannan keıin jańa prezıdent ash-Sharaa kúrd áskerı quramalary men úkimet organdaryn Sırııanyń memlekettik qurylymdaryna biriktirý nıetin málimdedi.
2025 jyldyń naýryz aıynda Sırııanyń demokratııalyq kúshteri men ótpeli úkimet arasynda tıisti kelisimge qol qoıyldy. Alaıda ol bir jylǵa jýyq ýaqyt ótse de oryndalmaı qaldy jáne eki tarap ta bir-birin kelisimdi buzdy dep aıyptaýdy jalǵastyryp otyr.
Ótken aptada Sırııa prezıdenti kúrdterdiń quqyqtary týraly jarlyqqa qol qoıdy.
Qujat sırııalyq kúrdterdiń mádenı, tildik jáne azamattyq quqyqtaryn ınstıtýtsıonaldyq turǵydan tanýǵa jáne ulttyq birlikti nyǵaıtýǵa baǵyttalǵan qadam retinde qarastyrylady.