Sırııa Úkimeti Qurban aıt kezinde soǵyspaıtyn boldy
ASTANA. 25 qazan. QazAqparat - Sırııalyq qaqtyǵysty retteýshi halyqaralyq deldal Lahdar Brahımı (Lakhdar Brahimi) 24 qazanda
resmı Damasktyń Qurban aıt kúnderinde kóterilisshilermen qaqtyǵysqa túspeıtindigin málimdedi. Bul týraly Reuters-ke silteme jasap, Lenta.rý jazady.
Sırııalyq Úkimet Qurban aıttyń 3 kúninde de olar tarapynan eshbir oq atylmaıtyndyǵyn basa aıtqan.
Brahımıdiń aıtýynsha, mundaı málimdemeni Sırııa basshylary onyń Damaskige arnaıy sapary kezinde jasaǵan.
Sonymen qatar, onyń aıtýynsha, kóterilisshilerdiń de kósemderi osynaý ulyq merekede qan tókpeýge bel baılapty. Burynyraq Sırııanyń soltústik aýdandaryndaǵy kóterilisshiler bıliktiń bul málimdemesine senimsizdikpen qarap, bul olardyń jasap otyrǵan kezekti qaqpany bolýy múmkin degen bolatyn.
Tipti keıbir kóterilisshiler Brahımıge beıbitshilik mıssııasynyń nátıjesi joqtyǵyn aıtyp, qyzmetinen ketýin talap etken edi. Degenmen, dıplomat bul keńeske qulaq aspaı, óz jumysyn jalǵastyra beretinin málimdegen.
Eń sońǵy derekter boıynsha, Sırııanyń syrtqy ister mınıstrligi Brahımıdiń sheshim shyǵarýda sál asyǵystyq jasaǵanyn, úsh kúndik kelisimniń áli de bolsa qabyldana qoımaǵandyǵyn jarııalady. Damask bul sheshimniń qorytyndysyn búgin, ıaǵnı 25 qazanda aıtatyndyǵyn málimdedi.
