Sırııa túrik taýarlaryna kedendik baj salyǵyn kúrt arttyrdy
ASTANA. KAZINFORM – Jańa sharalar is júzinde elder arasyndaǵy saýdany irkiltti, bul túrik eksporttaýshylaryn kúrdeli máselelerge ákep soqtyrdy.
Sırııanyń ótpeli úkimeti túrik taýarlaryna kedendik baj salyǵyn aıtarlyqtaı ulǵaıtyp, ony 300-500 paıyzǵa deıin arttyrdy.
2024 jyly jeltoqsanda Bashar Asad rejımi qulaǵannan keıin qurylǵan Sırııanyń ótpeli úkimeti Túrkııadan keletin ımportqa aıtarlyqtaı áser etetin sheshim qabyldady.
Osylaısha, jańa ákimshilik Túrkııa shekarasy arqyly ótetin ımporttyq taýarlarǵa kedendik baj salyǵyn 300–500 paıyzǵa deıin arttyrdy. Bul sheshim eki el arasyndaǵy saýdanyń toqtaýyna ákeldi. Túrik eksporttaýshylary men sırııalyq ımporttaýshylar ekonomıkanyń kóptegen salalarynda úlken qıyndyqtarǵa tap boldy. Ásirese Sırııanyń soltústigindegi oppozıtsııalyq kúshterdiń baqylaýyndaǵy shekaralyq ótkelder arqyly júzege asyrylatyn saýdada kúrdeli máseleler týyndady.
Ońtústik-Shyǵys Anadoly eksportshylary qaýymdastyǵynyń prezıdenti Djelal Kadooglý jańa baj salyǵy engizilgenge deıin Túrkııadan Sırııaǵa aı saıynǵy eksport shamamen 30 mıllıon dollardy quraǵanyn aıtty, alaıda jańa kedendik mólsherlemeler eksportty ekonomıkalyq turǵydan tıimsiz etip, saýdany tolyǵymen toqtatyp, shekaradaǵy uzyn-sonar kezekke alyp keldi.
– Jaǵdaı ásirese Sırııaǵa jetkizýge mamandanǵan kompanııalar úshin aýyr boldy, óıtkeni olar óz taýarlaryn basqa naryqtarǵa tez baǵyttaı almaıdy. Tarıfterdiń kúrt kóterilýi elge eksporttalatyn taýarlardyń barlyq túrlerine áser etti. Bul eldiń ońtústik-shyǵys aımaqtaryndaǵy kompanııalar úshin eleýli ekonomıkalyq shyǵyndarǵa ákelýi múmkin, – dedi Djelal Kadooglý.
Túrik sarapshylary jazǵandaı, bul másele saıası kún tártibine qoıyldy. Túrkııa Syrtqy ister mınıstri Hakan Fıdan Sırııanyń ótpeli úkimetiniń ókilderimen kezdesýde tarıf máselesin talqylaıdy dep kútilýde.
Qazir kóptegen eksporttaýshylar saýdany qalpyna keltirý jáne shyǵyndy azaıtý úshin máseleniń jyldam sheshimin kútýde.
Aıta keteıik, buǵan deıin 52 myńnan astam bosqyn Túrkııadan Sırııaǵa oralǵany týraly jazǵan edik.