Sırııa soty Bashar Asadty ólim jazasyna kesti
ASTANA.KAZINFORM - Sırııa 2024 jyldyń jeltoqsanyndaǵy bıliktiń aýysýynan keıin prezıdent Bashar Asadqa qarsy alǵashqy sot úkimin shyǵardy.
Damask soty seısenbi kúni Bashar Asadty syrttaı ólim jazasyna kesip, ony qasaqana kisi óltirý, azaptaý, adamzatqa qarsy jáne soǵys qylmystary úshin kináli dep tapty.
Damask qalasynyń Tórtinshi qylmystyq sotynyń sýdıasy Fahr ad-Dın ál-Arıan burynǵy prezıdenttiń jaýapkershiligi, basqalarmen qatar, onyń úkimettiń eń joǵary sheshim qabyldaýshy tulǵasy retindegi laýazymymen jáne qaqtyǵys kezindegi zańbuzýshylyqtarǵa qatysy bar qurylymdardy basqarýdaǵy rólimen baılanysty ekenin málimdedi.
Asadtyń týysqan aǵasy jáne Daraa provıntsııasyndaǵy saıası qaýipsizdik basqarmasynyń burynǵy basshysy Atef Nadjıbke de ólim jazasy taǵaıyndaldy.
Іstegi basqa aıyptalýshylardan aıyrmashylyǵy, ol sot otyrysyna qatysty. Nadjıb 2025 jyldyń qańtarynda qamaýǵa alynǵan.
Sondaı-aq, sot alty burynǵy áskerı jáne qaýipsizdik qyzmetkerin syrttaı ólim jazasyna kesti. Olardyń arasynda burynǵy prezıdenttiń aǵasy, buryn Sırııa armııasynyń elıtalyq 4-shi dıvızııasyn basqarǵan Maher Asad, Sırııanyń burynǵy qorǵanys mınıstri Fahd ál-Freıdj jáne Daradaǵy áskerı barlaýdyń burynǵy basshysy Lýaı ál-Álı de bar.
Sot sheneýnikterdi kisi ólimine, ólimshi etip azaptaýǵa jáne birneshe ret bas bostandyǵynan aıyrýǵa kináli dep taýyp, olardyń qylmysy «adamzatqa qarsy qylmys» jáne «soǵys qylmysy» retinde jikteldi.
Sırııadaǵy Ulttyq ótpeli ádilet komıssııasynyń basshysy Abdel Basıt Abdel Latıftiń aıtýynsha, sottyń bul sheshimi jábirlenýshiler quqyǵyn qalpyna keltirý jáne zań ústemdigin qamtamasyz etý jolyndaǵy mańyzdy qadam boldy.
Tyńdaýǵa halyqaralyq quqyqtyq jáne gýmanıtarlyq uıymdardyń ókilderi, sondaı-aq jábirlenýshilerdiń otbasylary qatysty. Asad pen burynǵy úkimet múshelerine qarsy sot protsesteri osy jyldyń sáýir aıynda bastaldy.
Іs 2011 jyly úkimetke qarsy narazylyqtar basylǵannan keıin bastalǵan azamat soǵysymen baılanysty. Qaqtyǵys jyldary kezinde jarty mıllıonnan astam adam qaza tapty, mıllıondaǵan sırııalyq úılerin tastap qashýǵa májbúr boldy, al on myńdaǵan adam habar-osharsyz ketti.
Bashar Asad Sırııany 2000 jyldan 2024 jyldyń jeltoqsanyna deıin basqardy. 2024 jyly onyń úkimetin qarýly oppozıtsııa shabýyly qulatty. Damask qulaǵannan keıin ol elden qashyp, Máskeýdi panalady.
Sáýir aıynda biz Sırııa soty Bashar Asad pen onyń aǵasyna qarsy syrttaı sot protsesin bastaǵanyn, al bir jyl buryn Sırııa soty qashqyn prezıdentti tutqyndaý týraly order shyǵarǵanyn habarlaǵan edik.
