Sırııa Prezıdenti B. Asad AQSh telearnasyna suhbat berdi
ÁBÝ-DABI. 9 qyrkúıek. QazAqparat - Sırııa Prezıdenti Bashar Asad aǵymdaǵy jyldyń tamyz aıynda Damask qalasynyń mańaıynda hımııalyq qarý qoldandy degen aıypty joqqa shyǵaryp otyr.
Bul týraly Sırııa basshysy amerıkandyq CBS News telearnasyna jeksenbi kúni bergen suhbatynda málimdedi. «Onda meniń óz halqyma qarsy hımııalyq qarý qoldaný jóninde buıryq berdi degen eshqandaı dálelder keltirilmedi», - dedi B.Asad.
Sonymen birge nemis buqaralyq aqparat quraldary Bashar Asadtyń qarýly kúshterdiń hımııalyq qarýdy qoldanǵany týraly bilmeýi de múmkin dep jazady.
Arnaıy qyzmettiń qolynda B.Asad pen onyń jaqtastarynyń áskerı bólimder men arnaıy bólimshelerdiń komandırlerimen kelissózderi bar kórinedi. Ol aqparǵa sáıkes, áskerıler sońǵy tórt jarym aı boıy prezıdentten hımııalyq qarý qoldanýdy talap etken eken. Alaıda prezıdent olardyń talaptaryn qabyl almady. Gazettiń pikiri boıynsha, bul B. Asadtyń hımııalyq qarý qoldanýǵa jeke basynyń qatysy joq ekenin kórsetedi, biraq el prezıdenti retinde odan jaýapkershilik alynbaıtyny atap ótiledi.
Osyndaı pikirler buryn da keltirilgen. 28 tamyz kúni Bloomberg portaly aty-jóni aıtylmaǵan BUU-nyń ókiline silteme jasaı otyryp, Damask qalasynda hımııalyq qarý qoldaný týraly buıryqty Bashar Asadtyń aǵasy Maher Asad berýi múmkin dep habarlady.
