Sırııa prezıdenti jalpy raqymshylyq týraly jarlyq shyǵardy

ASTANA. KAZINFORM — Sırııa prezıdenti Ahmad ash-Sharaa 18 aqpanda keıbir qylmystarǵa jalpy raqymshylyq jarııalap, birqatar jaza túrin jeńildetýdi kózdeıtin jarlyqqa qol qoıdy, dep habarlaıdy Anadoly.

Prezıdent ákimshiliginiń málimetinshe, 2026 jylǵy №39 zań osy jarlyq shyqqan kúnge deıin jasalǵan qylmystarǵa qatysty jalpy raqymshylyqty qarastyrady.

Jarlyqqa sáıkes, ómir boıyna bas bostandyǵynan aıyrý jáne ómirlik qamaý jazasy 20 jyldyq merzimge aýystyrylady. Alaıda adamǵa aýyr zııan keltirgen qylmystar bul jeńildikterge kirmeıdi. Mundaı jaǵdaıda jábirlenýshi jeke quqyǵynan bas tartsa ǵana jaza jeńildetilýi múmkin. Tek ótemaqy tóleý jeke quqyqtan bas tartý bolyp sanalmaıdy.

Eger jábirlenýshi jeke talap aryz bermegen bolsa, oǵan jarlyq jarııalanǵan kúnnen bastap úsh aı ishinde aryz jazý múmkindigi beriledi. Kórsetilgen merzimde aryz túspese, jaza jeńildetiledi.

Sondaı-aq jarlyq emdelmeıtin aýyr dertke shaldyqqan nemese 70 jastan asqan adamdardy belgili bir sharttarmen tolyq bosatýdy qarastyrady.

Raqymshylyq usaq quqyqbuzýshylyqtar men keıbir arnaıy zańdarda kórsetilgen qylmystarǵa, sonyń ishinde esirtkige, kontrabandaǵa, qarjylyq baqylaýǵa, zańsyz valıýta operatsııalaryna, sýbsıdııalanǵan taýarlardy zańsyz tasymaldaýǵa jáne tutynýshylar quqyǵyn qorǵaýǵa qatysty keıbir isterge taralady.

Sonymen qatar 2024 jylǵy 8 jeltoqsanǵa deıin jasalǵan belgili bir qylmystar, Áskerı qylmystyq kodeks pen Kıberqylmys týraly zańnyń keıbir baptary da qamtylǵan.

Keıbir ister boıynsha shartty raqymshylyq qarastyrylǵan. Mysaly, adam urlaý deregi boıynsha kúdikti jábirlenýshini belgilengen merzim ishinde óz erkimen, ótemaqysyz jáne zııan keltirmeı bosatsa, raqymshylyqqa iligýi múmkin. Qarý-jaraqqa qatysty qylmystarda úsh aı ishinde qarýdy tapsyrý talaby qoıylady.

Ýaqytsha jaza merziminiń jartysy qysqartylyp, kámeletke tolmaǵandarǵa qoldanylǵan qaıta tárbıeleý jáne baqylaý sharalary joıylady.

Keı jaǵdaılarda raqymshylyq alý úshin kúdiktiler 60 kún ishinde óz erkimen kelip, jeke talaptardan bas tartyp nemese júktelgen mindettemelerdi oryndaýy tıis.

Alaıda «sırııa halqyna qarsy aýyr quqyqbuzýshylyqtar», azaptaý, adam saýdasy, jezókshelik, elektr jáne telekommýnıkatsııa jelilerin urlaý, uıymdasqan qylmys jáne esirtkige qatysty keıbir aýyr qylmystar raqymshylyqqa jatpaıdy.

Qujatta azamattyq-quqyqtyq sıpattaǵy ótemaqy aıyppuldary raqymshylyqqa kirmeıtini, al bas bostandyǵynan aıyrýmen baılanysty aıyppuldar qamtylatyny kórsetilgen. Jarlyq shyqqanǵa deıin tólengen qarajat qaıtarylmaıdy.

Sonymen birge ádilet mınıstriniń sheshimimen medıtsınalyq komıssııalar qurylyp, densaýlyq jaǵdaıyna baılanysty isterdi qaraıdy. Raqymshylyqqa ótinish berý merzimi – eki aı. Jarlyq resmı jarııalanǵan sátten bastap kúshine enedi.

Osyǵan deıin Sırııa bıligi men kúrd kúshteri keshendi kelisimge qol qoıǵanyn jazǵan bolatynbyz.