Sırııa prezıdenti kúrdterdiń quqyqtary týraly jarlyqqa qol qoıdy
ASTANA. KAZINFORM — Sırııa prezıdenti Ahmed ash-Sharaa kúrd halqynyń Sırııa halqynyń ajyramas bóligi jáne eldiń ulttyq biregeıligi retindegi mártebesin bekitý týraly jarlyqqa qol qoıdy, dep habarlaıdy Anadoly.
Qujat sırııalyq kúrdterdiń mádenı, tildik jáne azamattyq quqyqtaryn ınstıtýtsıonaldyq turǵydan tanýǵa jáne ulttyq birlikti nyǵaıtýǵa baǵyttalǵan qadam retinde qarastyrylady.
Jarlyqta kúrdterdiń mádenı jáne tildik bolmysy birtutas, kóp qyrly Sırııa ultynyń quramdas bóligi ekendigi atap ótilgen.
Ahmed ash-Sharaanyń aıtýynsha, memleket etnomádenı ártúrlilikti qorǵaýǵa jáne shyqqan tegine qaramastan barlyq azamattardyń teń quqyqtaryn qamtamasyz etýge tikeleı jaýapty.
Qujatta Sırııa egemendigi aıasynda kúrdterdiń mádenı murasyn, ónerin saqtaýǵa, ana tilin damytýǵa memlekettik kepildikter qarastyrylǵan. Kúrd tiline ulttyq til mártebesi berildi: halqy yqsham kúrdter turatyn aımaqtarda ony memlekettik jáne jeke oqý oryndarynda fakýltatıvtik kýrs retinde nemese bilim berý jáne mádenı baǵdarlamalardyń bir bóligi retinde oqytýǵa ruqsat etiledi.
Jarlyqtyń bólek bólimi Haseke provıntsııasyndaǵy kúrd halqynyń quqyqtyq mártebesine qatysty. 1962 jylǵy halyq sanaǵynan beri qoldanylyp júrgen barlyq erekshe sharalar men zańdardyń kúshi joıylýy kerek. Elde turatyn kúrd tekti barlyq azamattarǵa, sonyń ishinde tirkelmegenderge Sırııa azamattyǵyna tolyq teń quqyqtar men mindetter beriledi.
Sonymen qatar, 21 naýryzda toılanatyn Naýryz búkil Sırııa Arab Respýblıkasynda resmı mereke bolyp jarııalandy. Ol kóktem men halyqtardyń baýyrlastyǵyn bildiretin ulttyq mereke retinde bekitilgen.
Jarlyq sonymen qatar memlekettik BAQ pen bilim berý mekemelerine ınklıýzıvti ulttyq dıskýrsty ustaný mindetin engizedi. Etnıkalyq nemese tildik belgileri boıynsha kemsitýdiń nemese alyp tastaýdyń kez kelgen nysanyna zańmen tyıym salynady. Al ultaralyq arazdyqty qozdyrý qoldanystaǵy zańnamaǵa sáıkes jaýapkershilikke ákep soǵady.
Buǵan deıin YPG/SDG terrorısteriniń Aleppodaǵy sońǵy shtaby Sırııa bıliginiń qolyna ótkeni týraly jazdyq.