Sırııa prezıdenti Izraılmen qaýipsizdik jónindegi kelisim jasaý múmkindigin málimdedi
ASTANA. KAZINFORM – Sırııa prezıdenti Ahmed ash-Sharaa Izraılmen qaýipsizdik salasyndaǵy kelisimge qol jetkizý múmkin ekenin málimdedi. Onyń aıtýynsha, mundaı qujat Sırııanyń Golan jotalaryna qatysty ustanymynan bas tartpaı-aq, eki el arasyndaǵy jan-jaqty beıbitshilikke jol ashýy kerek, dep habarlaıdy Kazinform agenttiginiń menshikti tilshisi.
Ahmed ash-Sharaa bul týraly Al Jazeera telearnasyna bergen suhbatynda aıtty.
– Biz Izraılmen teketiresten qashýǵa tyrysamyz, óıtkeni bul Sırııanyń múddesine saı kelmeıdi, – dedi Sırııa prezıdenti.
Onyń aıtýynsha, Damask Izraılge qysym jasap, Sırııaǵa qatysty teńgerimdi saıasat ustanýǵa yntalandyratyn memleketterdiń qoldaýyna ıe bolýǵa umtylyp otyr.
Ahmed ash-Sharaa sondaı-aq Sırııa Lıvandaǵy jaǵdaıǵa áskerı jolmen aralasýdy josparlamaıtynyn aıtty. Onyń pikirinshe, kórshi eldegi daǵdarysty keshendi túrde sheshý qajet, al kúsh qoldaný týraly sheshim qabyldaý quqyǵy tek Lıvan memleketiniń ózine tıesili bolýy kerek.
2024 jyldyń jeltoqsanynda Sırııanyń burynǵy prezıdenti Bashar Asad bılikten ketkennen keıin Izraıl áskeri Sırııa aýmaǵyndaǵy birqatar strategııalyq aýdandy, sonyń ishinde demılıtarızatsııalanǵan aımaqtaǵy Hermon taýynyń sırııalyq bóligin baqylaýǵa alǵan bolatyn. Sodan beri Izraıl Sırııa aýmaǵyna turaqty túrde soqqy jasap keledi. Izraıl mundaı operatsııalardy eldiń ońtústik-batysyndaǵy drýz qaýymyn qorǵaý maqsatymen túsindiredi.
Sonymen qatar, Sırııanyń SANA agenttiginiń habarlaýynsha, Izraıl artıllerııasynyń Maarııa aýylyn atqylaýy saldarynan elektr transformatory joıylyp, turǵyn úılerdiń bir bóligi jaryqsyz qalǵan.
Sol kúni Sırııaǵa saparmen barǵan BUU Bas hatshysy Antonıý Gýterrısh eldiń egemendigin, táýelsizdigin, birligi men aýmaqtyq tutastyǵyn qurmetteýge shaqyryp, Sırııaǵa salynǵan barlyq sanktsııalardy alyp tastaýǵa úndedi.
