Sırııa prezıdenti ash-Sharaaǵa qastandyq jasalǵany ras pa

ASTANA. KAZINFORM — Sırııa Іshki ister mınıstrliginiń baspasóz hatshysy Nýreddın ál-Baba «eldiń ýaqytsha prezıdenti Ahmed ash-Sharaǵa qastandyq jasaldy» degen áleýmettik jelide taraǵan aqparatty joqqa shyǵardy. Bul týraly TASS agenttigi jazdy.

— Bul aqparat múldem jalǵan jáne shyndyqqa sáıkes kelmeıdi. Sońǵy kúnderi prezıdentke nemese basqa joǵary laýazymdy sheneýnikterge qatysty eshqandaı oqıǵa bolǵan joq, — dep jazdy sheneýnik Facebook jelisinde. 

Ál-Baba azamattar men BAQ ókilderin jaýapkershilikti sezinýge jáne memlekettik organdardyń naqty aqparattaryn paıdalanýǵa shaqyrdy.

Asharq Al-Awsat gazetiniń habarlaýynsha, sońǵy eki kún ishinde áleýmettik jelilerde jasandy ıntellekt arqyly jasalǵan jańylystyratyn sýretter taratyldy. Damaskide prezıdent Ahmed ash-Sharaa men onyń kómekshileriniń biri shabýyl kezinde jaraqat alǵan dep aıtyldy.

Buǵan deıin Sırııa prezıdentiniń BAQ jónindegi keńesshisi Ahmed Zeıdan X gazetinde «30 jeltoqsanda prezıdent saraıynyń mańynda jáne astananyń Mezze-86 yqsham aýdanynda jarylys pen atys boldy» degen qaýesetter shyndyqqa janaspaıtynyn jazǵan. Ol jalǵan aqparat taratýdy «zulym kúshterdiń aılasy» dep sıpattady.

Dúısenbi kúni keshke sırııalyq «Al Watan» gazeti prezıdent Ahmed ash-Sharaanyń Mezze dańǵylynyń boıynda serýendep júrgen fotosýretterin jarııalady.

Eske salaıyq, Sırııa ótken aptada jańa banknottaryn tanystyrdy.