Sırııa prezıdenti Ahmed ash-Sharaa resmı saparmen AQSh-qa bardy

ACTANA. KAZINFORM – Bul sapar Vashıngton ash-Sharaany terrorızmmen baılanysty adamdar tiziminen alyp tastaǵannan keıin múmkin boldy, dep habarlaıdy BBC.

Amerıka úkimetiniń bul sheshimin Memlekettik departament juma kúni jarııalady.

Memlekettik departamenttiń ókili Tommı Pıggot túsindirgendeı, bul qadam «Bashar Asad ketkennen keıin Sırııa basshylyǵynyń qol jetkizgen jetistikterin jáne elý jyldan astam ýaqyttaǵy repressııa rejımin» kórsetedi.

Onyń aıtýynsha, qazirgi Sırııa bıligi AQSh-tyń birqatar talabyn oryndap jatyr. Atap aıtqanda, Sırııada joǵalyp ketken amerıkalyqtardy izdeýge yntymaqtasý jáne elde qalǵan hımııalyq qarý qorlaryn joıýǵa kúsh salý.

Ál-Qaıdamen (QR aýmaǵynda tyıym salynǵan uıym - red.) baılanysy bar ash-Sharaa buǵan deıin AQSh-tyń «arnaıy belgilengen jahandyq terrorıster» tiziminde bolǵan jáne ony ustaǵany úshin syıaqy usynylǵan.

Túrkııa men Parsy shyǵanaǵy elderiniń qoldaýymen ash-Sharaa bastaǵan kúshter Sırııada bılikke shamamen bir jyl buryn Damaskke jedel shabýyl jasaǵannan keıin keldi.

Dúısenbide Sırııa kóshbasshysy «jańa Sırııany» qoldaýǵa ýáde bergen AQSh prezıdenti Donald Tramppen kezdesý úshin Aq úıge barady.

AQSh-tyń odaqtasy Izraıl Damaskpen jaqyndasýǵa qarsy jáne Asad rejımi qulaǵannan beri Izraıl radıkaldy ıslamshylar dep sanaıtyn jańa úkimetke áskerı arsenaldardyń berilýine jol bermeý úshin Sırııa aýmaǵyna ondaǵan shabýyl jasady.

Aıta keteıik, Sırııa prezıdenti Bashar Asad ótken jyly jeltoqsanda el astanasynan ketip qaldy.

Bıyl qańtardyń sońynda Ahmed ash-Sharaa Sırııanyń ótpeli kezeńdegi prezıdenti bolyp jarııalandy.

Buǵan deıin Sırııa prezıdenti 1967 jyldan beri alǵash ret BUU Bas Assambleıasyna qatysqanyn habarlaǵan edik.

AQSh Sırııa prezıdentin terrorıster tiziminen shyǵardy.