Sırııa oppozıtsııasy Damaskiniń Asad rejıminen azat etilgenin jarııalady — Al Jazeera

ASTANA. KAZINFORM — Sırııanyń qarýly oppozıtsııasy el astanasy Damaskini jaýlap alǵanyn, al prezıdent Bashar Asad elden qashqanyn málimdedi, dep habarlaıdy Kazinform agenttigi Al Jazeera-ǵa silteme jasap.

«Haıat Tahrır ash-Sham» komandıri Ábý Muhammed ál-Jýlanı barlyq memlekettik mekemeler resmı túrde tapsyrylǵansha premer-mınıstr Muhammed Ǵazı ál-Jalalı baqylaýynda bolatynyn aıtty. Ol málimdemesinde oppozıtsııa 8 jeltoqsandy «jańa dáýirdiń bastamasy» dep atap, «jańa Sırııa» barlyq sırııalyqtardyń «beıbit mekenine» aınalatynyn jetkizdi.

Bul málimdeme oppozıtsııalyq toptardyń jyldam shabýylmen birneshe qalany basyp alǵannan keıin birneshe saǵattan soń jasaldy. Keıin Muhammed Ǵazı ál-Jalalı halyq saılaǵan kez kelgen úkimetpen yntymaqtasýǵa daıyn ekenin bildirdi.

— Bul el óz kórshilerimen jáne álemmen jaqsy qatynastar ornatatyn qalypty el bolýy múmkin… biraq bul másele jańa basshylyqqa baılanysty. Biz onymen yntymaqtastyqqa daıynbyz, — dedi ol.

ál-Jalalı óziniń «laýazymdar men artyqshylyqtarǵa» emes, Sırııa úkimetiniń ınstıtýttaryn saqtaýǵa múddeli ekenin atap ótip, elden ketýdi josparlamaıtynyn aıtty.

— Biz bul el qaramaǵyndaǵy eshkimge zııan keltirmeımiz dep aıtqan oppozıtsııaǵa qol ushyn sozamyz, — dedi ol Al Jazeera-ǵa.

Buǵan deıin Qatar, Saýd Arabııasy, Iordanııa, Mysyr, Irak, Iran, Túrkııa jáne Reseı birlesken málimdeme jasap, daǵdarysty «qaýipti oqıǵalardyń damýy» dep atap, saıası sheshimge shaqyrdy.

Aqparatty Al Jazeera agenttigi arnaıy Kazinform úshin usyndy.

Buǵan deıin habarlanǵandaı, Sırııa prezıdenti Bashar Asad jeksenbide el astanasynan belgisiz baǵytqa ushyp ketken. Sırııadaǵy adam quqyqtary boıynsha monıtorıng ortalyǵy onyń qaladan senbi kúni keshki saǵat 10-da ketkenin habarlady.