Sırııa: oppozıtsııa tártipti qalaı qalpyna keltirmek
ASTANA. KAZINFORM - Bashar Asadtyń taqtan taıǵany týraly jańalyqty Damashyq kóshelerinde de, álemniń ózge elderindegi sırııalyq qoǵamdastyqtarda da halyq bórkin aspanǵa ata qarsy aldy. Deıturǵanmen, Haııat Tahrır ash-Sham (HTSh) kóterilisshileri (Qazaqstanda terrorıstik uıym dep tanylǵan) el tizginin ustaǵan soń endigi ahýaldyń qalaı qalyptasatynyna boljam aıtý qıyn, dep habarlaıdy Kazinform-nyń menshikti tilshisi.
Sırııalyq jáne halyqaralyq BAQ-tyń habarlaýynsha, dúısenbi kúni Damashyqta oppozıtsııanyń saıası departamenti men sheteldik dıplomatııalyq mıssııalar arasynda dúrkin-dúrkin kezdesý ótti.
Kezdesýlerde Sırııanyń saıası bolashaǵy men qaýipsizdik máselesi, sondaı-aq bosqyndardyń elge oralýy úshin qolaıly jaǵdaı jasaý men beıbitshilikti nyǵaıtý joldary talqylandy.
Oppozıtsııa ózderiniń maqsaty qoǵamdaǵy tatýlyq, ádildik ustanymdarynyń jáne Sırııanyń halyqaralyq qatynastarynyń nyǵaıýy ekenin málimdedi. Olar eldegi bılikti qolǵa alǵan soń jaǵdaıdy turaqtandyrýǵa baryn salyp jatqanyn aıtty.
— Bizdiń qarýly kúshter el astanasyn tolyqtaı baqylaýǵa alýdy aıaqtap qaldy. Jańa úkimet áli jasaqtalǵan joq, ol qurylǵan soń birden jumysqa kirisedi, - dep málimdedi dúısenbi kúni Asad rejımin qulatqan uıymnyń basqarýshy organy — Áskerı operatsııalar departamenti.
Buǵan deıin Áskerı operatsııalar departamenti turǵyndardyń ómiri men múlkin qorǵaý, memlekettik menshiktiń qaýipsizdigin saqtaý úshin birqatar jańa sharalar qolǵa alynǵanyn jarııalaǵan. Oǵan saı, qoǵamdyq tártipti buzǵandar men qylmys jasaǵandarǵa qandaı jaza taǵaıyndalatyny aıqyndalǵan:
— abaısyzda oq atqan adam 1 jyl bas bostandyǵynan aıyrylady;
— memleket múlkin, kólik quraldaryn nemese qural-jabdyqtardy urlaǵan adam 4 jyl bas bostandyǵynan aıyrylady;
— jeke menshikke qol suqqan adam 4 jyl bas bostandyǵynan aıyrylady;
— memleketke tıesili qarýdy jańa bılik organdaryna bermeı saqtaǵan adam 4 jyl bas bostandyǵynan aıyrylady.
Sırııa oppozıtsııasynyń qaýipsizdik kúshteri men polıtsııasy qoǵamdyq qaýipsizdik pen memlekettik ınstıtýttardy kúsheıtý úshin dúısenbi kúni Damashyqta jumysyn údete bastady. Sonymen qatar qaýipsizdikti qamtamasyz etý maqsatynda Damashyqta saǵat 16:00-den 05:00-ge deıin komendanttyq saǵat engizildi.
AlArabiya-nyń habarlaýynsha, Sırııanyń Ortalyq banki jergilikti bankterdegi turǵyndardyń jınaǵyna esh qaýip joǵyn málimdegen. Sondaı-aq seısenbide eldiń Ortalyq banki men ekinshi deńgeıli bankter jumysyn jandandyrmaq.
Dúısenbi kúni sırııalyq kóterilisshiler Asad bıligi kezinde áskerge alynǵan barlyq áskerı qyzmetshilerge raqymshylyq jasaıtynyn málimdedi.
– Áskerı operatsııalar departamenti mindetti qyzmetke shaqyrylǵan barlyq sarbazdarǵa jalpylaı raqymshylyq jarııalaıdy. Olardyń ómirine esh qaýip tónbeıtinine kepildik berilgen, - delingen habarlamada.
Oppozıtsııa bergen ýáde
Oppozıtsııanyń Saıası máseleler departamenti ókili ál-Jazıraǵa bergen suhbatynda birqatar málimdemeler jasady. Atap aıtqanda endigi bılik sırııalyq bosqyndardy elge qaıtarý úshin jaǵdaı jasaýǵa jáne olarǵa qaýipsiz ortany qamtamasyz etýge kúsh salatynyn aıtty. Ol bosyp ketýge májbúr bolǵan sırııalyqtardy qaıta oralýǵa jáne eldi aıaǵynan turǵyzýǵa úles qosýǵa shaqyrdy.
Endigi kezeńde elde ádildik pen teńdikke negizdelgen jalpyqoǵamdyq tatýlyq pen túsinýshilik ornaýy tıis. Saıası máseleler departamenti ókiliniń aıtýynsha, olar adamdardyń múddesin qorǵaıtyn ınstıtýttar men ádildik pen tártipti qamtamasyz etetin memleket qurý jolynda jumystardy atqaryp jatyr.
Sondaı-aq ol Sırııa ózara qurmet negizinde barlyq eldermen qarym-qatynasyn nyǵaıtýdy kózdep otyrǵanyn aıtty.
Kóterilisshiler elde áıelderge qandaı da bir dress-kod telinbeıtinin, ár adamnyń jeke erkindigi qamtamasyz etiletinin, jeke tulǵanyń quqyǵyn qurmetteý órkenıetti el qurýdyń negizi bolatynyn atap ótken.
Býferlik aımaqtaǵy Izraıl
Osy oraıda Izraıldiń syrtqy ister mınıstri Gıdeon Saar Sırııadaǵy ózderi «hımııalyq qoımalar men zymyrandar ornalasqan» dep tanyǵan nysandardy atqylaǵandaryn málimdedi. Olar bul qadamǵa qarýlar ekstremıstik uıymdardyń qolyna túsýine jol bermes úshin barǵan.
Izraıl qarýly kúshteri sońǵy saǵattarda ÁÁK Sırııadaǵy áskerı nysandaryna 150-den astam áýe shabýylyn jasaǵanyn málimdedi.
Buǵan deıin Izraıl Sırııamen shekarada ornalasqan Golan bıigindegi býferlik aımaqqa áskerin jiberdi.
Odan soń Izraıl áskeri Golan syrtyndaǵy Sırııa aýmaǵyna kirdi.
Olardyń pikirinshe, Sırııanyń burynǵy prezıdenti Bashar Asad elden ketken soń bul aımaqta turaqsyzdyqtyń kúsheıýi múmkin degen qaýipke baılanysty Izraıl áskeri Golannyń syrtyna qaıta ornalastyryldy.