Sırııa oppozıtsııasynyń eshqaısysy «Islam memleketi» qozǵalysyn qoldap otyrǵan joq - N. Sarbas

ASTANA. QazAqparat - Sırııa oppozıtsııasynyń eshqaısysy «Islam memleketi» qozǵalysyn qoldap otyrǵan joq. Bul týraly búgin elordada sırııalyq oppozıtsııa ókilderi kelissózderiniń qorytyndysy boıynsha ótken baspasóz máslıhatynda Sırııadaǵy kúrdter qozǵalysynyń ókili Nabı Sarbas málim etti.

«Islam memleketi» qozǵalysyna qas jaýymyzdaı qarap otyrmyz. Oppozıtsııanyń eshqaısysy olardy qoldap otyrǵan joq. Ideologııa men basqa da máseleler boıynsha biz «IM» ókilderiniń qas dushpanymyz»,-dedi N. Sarbas.

Osy oraıda ol sırııalyq daǵdarys boıynsha sheshimdi barynsha tezirek jasaý kerek ekenin atap ótti.

«Bizdiń uranymyz - bostandyq. Meniń oıymsha, «Islam memleketi» qozǵalysy bostandyq ustanymyn nasıhattamaıdy, olar ózderinen ózgeshe adamdardyń barlyǵyn óltirýde. Ekstremızm, bul zardaby aýyr qubylys. Órkenıetti eldi qurý úshin oǵan qarsy is-qımyldy barynsha tezirek tabý qajet»,-dedi N. Sarbas.