Sırııa oppozıtsııasy bólinýge shaq qap tur
ASTANA. 19 naýryz. QazAqparat - Al-Hayat basylymy habarlaǵandaı, Sırııa revolıýtsııalyq jáne oppozıtsııalyq kúshteri ulttyq koalıtsııasynyń prezıdenti Mýaz Hatyb ornynan ketýi múmkin.
Mýaz Hatyb pen ózge oppozıtsııa serkeleriniń arasynda ýaqytsha úkimetti jasaqtaýǵa baılanysty túsinbestik bolǵan kórinedi. Mýaz Hatybtyń aıtýynsha, ýaqytsha úkimetti jasaqtaýdyń arty oppozıtsııanyń jik-jikke bólinýine aparyp soqtyrýy yqtımal.
Sırııadaǵy jaǵdaıdy qalt jibermeı qadaǵalap otyrǵan AQSh Memlekettik hatshysy Djon Kerrı ýaqytsha úkimet jasaqtaý úshin rejim men oppozıtsııa kelissózdi bastaýy tıis dep otyr. Buryn AQSh Bashar Asadqa ymyrasyz saıasat ustanyp, bılikten ketýin qatań talap etken bolatyn.
muslim.kz saıtynyń jazýynsha, Ulybrıtanııanyń premer-mınıstri Devıd Kemeron Sırııaǵa qarý-jaraq eksporttaýǵa salynǵan tyıymdy uzartýǵa qatysty daýys bergen kezde óziniń veto qoıý quqyǵyn paıdalanatynyn málimdedi. Germanııaǵa kelsek, Ulybrıtanııanyń bul ustanymyna túbegeıli qarsy. Germanııa óz kezeginde tyıymnyń kúshi joıylatyn bolsa, aımaqtaǵy jaǵdaı ýshyǵyp ketedi dep sanaıdy.
Katarlyq al-Jazeera telearnasy habarlaǵandaı, «ál-Kaıda» terrorıstik uıymy Iraktyń Anbar provıntsııasynan Sırııaǵa bet alǵan 48 sırııalyq sarbazdyń ólimin óz moıyndaryna aldy. Al «Vatannyń» habarlaýynsha, Iran sırııalyq rejimge kórsetip jatqan kómegin arttyrǵan kórinedi.
Al-Hayat basylymy sırııalyq oppozıtsııanyń deregine súıenip, Bashar Asadtyń rejimin jaqtaıtyn ıraktyq jaýyngerlerdiń Lıvan arqyly Sırııa aýmaǵyna ótip jatqanyn habarlady. Sırııa oppozıtsıonerleriniń sózine qaraǵanda, munyń artynda Iran tur. Naqtyraq aıtsaq, osy aptada 500-den asa Irak sarbazy Basra, En-Nadjaf jáne Baǵdat arqyly Beırýt áýejaıyna kelip, «Hızbýlla» sodyrlarymen birge Sırııaǵa baǵyt túzegen.
Bashar Asad rejimi Lıvandaǵy qarýly «qaraqshylar» toby «Sırııa aýmaǵyna ótetin bolsa», jermen-jeksen etetinderin málimdedi. Bul jaıynda sırııalyq SANA aqparat portaly habar taratty.
