Sırııa men Iraktaǵy qarýly qaqtyǵysqa 150-den astam qazaqstandyq qatysýda - N.Ábiqaev
ASTANA. QazAqparat - Sırııa men Iraktaǵy qarýly qaqtyǵysqa qatysyp júrgen qazaqstandyqtarmen birge 200-den astam olardyń áıelderi, sodyrlardyń jesirleri jáne balalary júr. Bul týraly búgin Astanadaǵy Ortalyq jáne Ońtústik Azııa elderindegi zorlyq-zombylyq ekstremızmge qarsy is-qımyl jónindegi óńirlik konferentsııada QR Ulttyq qaýipsizdik komıtetiniń tóraǵasy Nurtaı Ábiqaev málim etti.
«Qazirgi kezde Sırııa men Iraktaǵy qarýly qaqtyǵysqa 150-den astam qazaqstandyq qatysýda, olarmen birge 200-den artyq áıelderi, sodyrlardyń jesirleri jáne balalary birge júr. Keıbir kezderde jýrnalıster «osyndaı adamdardyń elden ketýine tosqaýyl jasaýdyń qajeti qansha? Olar joldaryn ózderi tańdaıdy. Aýǵanstanda, Sırııada qaza bolǵan ondaǵan qazaqstandyq sekildi mert bolǵysy kelse, bul olardyń ózderiniń quqyǵy» degen saýaldar qoıylyp jatady. Alaıda bizdiń azamattar áskerı qylmysker, lańkes atanyp, Otanynan alys jerde ómiri qıylyp jatqan jaǵdaıdy qalypty qubylys dep sanamaımyz. Sonymen qatar rýhanı-adamgershilik baǵytta adasqan osy adamdar lańkestik kúreste kásibı daǵdysyn jetildirip, zaqymdanǵan sana-sezimimen qaıta oralýy múmkin»,- dedi QR UKK tóraǵasy.
Sonymen qatar N.Ábiqaev problemanyń taǵy bir aspektisi retinde ınternet pen BAQ-ta DAISh-ke (Islam memleketi) qatysty shekten tys nazar aýdarylyp otyrǵandyǵyn atap ótti.
