Sırııa men Iraktaǵy lagerlerde 60 myńǵa jýyq azamat tutqynda otyr - BUU
TAShKENT. KAZINFORM – Bizdiń esebimizge saı, Sırııanyń soltústik-shyǵysy men Iraktaǵy lagerlerde 55-60 myńǵa jýyq azamat tutqynda otyr. Bul týraly Ózbekstan astanasynda ótken urys aımaǵynan qaıtarylǵandardy ońaltý jónindegi óńirlik sarapshylar keńesinde BUU Bas hatshysynyń orynbasary Vladımır Voronkov málim etti, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Keńestiń alǵashqy otyrysyna memlekettik organ basshylary, sarapshylar men ońaltý baǵdarlamasyn júzege asyryp jatqan psıhologtar qatysty.
Qazaqstandyq delegatsııany Mádenıet jáne aqparat vıtse-mınıstri Qanat Ysqaqov bastap keldi. Ol óz sózinde halyqaralyq uıymdarmen birlese júrgizilgen «Jýsan» operatsııasynyń mańyzyna toqtaldy. Onyń aıasynda Qazaqstanǵa 180 áıel, 500-den astam bala men 37 er adam qaıtaryldy. Jetim qalǵan 34 búldirshin jaqyndarymen qaýyshty.
Mamandardyń dereginshe, Qazaqstanda áıelder men balalardy ońaltý, azamattyǵyn qalpyna keltirý jáne quqyqtyq kómek kórsetý máseleleri júıeli jolǵa qoıylǵan.
«Búgingi tańda AQSh, Eýropa elderi jáne Ortalyq Azııanyń qolǵa alǵan ońaltý baǵdarlamasynyń nátıjesi óte zor dep aıtýǵa bolady. Qazir ol áıelder men balalardan qoǵamǵa jáne memleketke esh qaýp joq dep aıtýǵa negiz bar. Búkil balalar ata-ájeleri tarapynan qamqorlyqqa alyndy. Ol búldirshinder mektepte oqıdy. Basty mıssııa - bala men áıeldi bir-birnen aıyrmaý, jetimder úıine bermeý», - dedi qazaqstandyq psıholog, Sırııadan oralǵan áıelderdi ońaltý baǵdarlamasynyń ulttyq sarapshysy Gúlnaz Razdyqova.
Sondaı-aq, basqosýda BUU Bas hatshysynyń orynbasary, Lańkestikke qarsy basqarmasynyń basshysy Vladımır Voronkov áli de urys aımaqtarynda álem elderiniń kóptegen azamaty qalyp otyrǵanyn aıtty.
«Ókinishke qaraı, Sırııanyń soltústik-shyǵysy men Iraktaǵy lagerlerde qanshama eldiń azamaty tutqynda otyr. Bizdiń esebimizge saı, olardyń sany 55-60 myńǵa jetedi. Birinshi kezekte áıelder men balalar jaıly aıtyp otyrmyz. Olardy elderine qaıtarý jáne qalypty ómirge beıimdeý turǵysynda atqarylatyn jumys kóp. Osy turǵyda Ortalyq Azııa elderiniń tájirıbesi asa mańyzdy», - dep toqtaldy Vladımır Voronkov.
Buǵan qosa sarapshylar «Jýsan» sııaqty gýmanıtarlyq operatsııany Ortalyq Azııanyń ózge de memleketteri júrgizgenin atap ótti. Máselen, Ózbekstan qaqtyǵys aımaqtarynan - 531, Qyrǵyzstan - 511 jáne Tájikstan 381 azamatyn qaýipsiz jerge kóshirgen.
