Sırııa máselesin talqylaıtyn ókilder Astanaǵa keshke keledi - SІM

ASTANA. QazAqparat - Sırııa daǵdarysy boıynsha Astana protsesiniń jetinshi kezdesýine qatysatyn delegatsııalar búgin, ıaǵnı 29 qazan kúni keshke kele bastaıdy. Bul aqparatty QR SІM baspasóz qyzmetiniń basshysy Ánýar Jaınaqov rastady, dep habarlaıdy QazAqparat tilshisi.

«Astana protsesine qatysatyn delegatsııalar búgin keshke kele bastaıdy. Taraptyń ekijaqty jáne úshjaqty kezdesýleri erteńge josparlanyp otyr», - dedi Ánýar Jaınaqov.

Eske sala ketsek, Astana protsesinde Reseı delegatsııasyna RF Prezıdentiniń Sırııa jónindegi arnaıy ókili Aleksandr Lavrentev, Túrkııa delegatsııasyna syrtqy ister mınıstriniń orynbasary Sedat Onal, Iran delegatsııasyna syrtqy ister mınıstriniń orynbasary Hýseın Djaberı Ansarı basshylyq etedi.

Astana protsesiniń jetinshi kezdesýi Sırııada urys is-qımyldaryn doǵarý rejımin nyǵaıtý boıynsha qol jetkizilgen nátıjelerdi saqtaýǵa, sondaı-aq daǵdarysty saıası retteýge ótý kezeńinde atalǵan eldegi jaǵdaıdy ári qaraı turaqtandyrýǵa baǵyttalǵan.