Sırııa, Lıvan, Iordanııa jáne Túrkııa bolashaqta biryńǵaı ekonomıkalyq keńistik qurýǵa ýaǵdalasty
ASTANA. Maýsymnyń 11-i. QazAqparat - Sırııa, Lıvan, Iordanııa jáne Túrkııa osy memleketter arasynda yntymaqtastyq qurýǵa ýaǵdalasty, bolashaqta onyń maqsaty osy elderdiń biryńǵaı ekonomıkalyq keńistigin qurý kózdelýde. Bul sheshim Ystambulda ótken ekonomıkalyq forým aýqymynda Túrkııa men arab memleketteri syrtqy ister mınıstrleriniń kezdesýinde qabyldandy.
Kezdesýge qatysýshylar sondaı-aq Gaza sektorynan Izraıl qorshaýyn alý qajettigin atap kórsetti jáne osy aımaqqa gýmanıtarlyq kómek alyp bara jatqan «Bostandyq flotılııasy» kemesin basyp alýdaǵy Tel-Avıvtiń áreketin aıyptady. Budan basqa, Túrkııa, Lıvan, Sırııa jáne Iordanııa Iraktyń aýmaqtyq tuastyǵyn jáne egemendigin saqtaýdy, onda turaqtylyqty ornatýdy jáne ırak qoǵamynyń barlyq kúshteriniń múddesin bildiretin úkimet qurýdy jaqtaıtynyn málimdedi.
