Sırııa qaýipsizdik maqsatynda úsh provıntsııadaǵy saılaýdy keıinge qaldyrdy
ASTANA.KAZINFORM - Jalǵasyp jatqan qaýipsizdik máselelerine baılanysty Sırııanyń birqatar óńirinde daýys berý keıinge shegerildi, dep habarlaıdy Kazinform agenttiginiń menshikti tilshisi.
Sırııanyń halyqtyq keńesi (parlament) Joǵarǵy saılaý komıssııasy Sýveıda, Hasek jáne Rakka provıntsııalaryndaǵy qaýipsizdik máselelerine baılanysty daýys berýdiń keıinge qaldyrylǵanyn jarııalady, dep habarlaıdy SANA aqparat agenttigi.
Saılaý komıssııasynyń resmı ókili Navar Nadjmeniń aıtýynsha, aımaqtarǵa taǵaıyndalǵan mandat saılaý ótkizilgenge deıin saqtalady. Al saılaý «qolaıly jaǵdaı jasalyp, qaýipsiz orta» qamtamasyz etilmeıinshe ótpeıdi.
- Bul sheshim osy provıntsııalar turǵyndarynyń ádil ókildigi úshin, sondaı-aq saılaý tek qana memleket resmı mekemelerdi tolyǵymen baqylaıtyn jáne qaýipsiz ortany qamtamasyz etetin aımaqtarda ótýi kerek ekenin eskere otyryp qabyldandy, - dedi ol.
Sýveıdadaǵy qaqtyǵystar
Halyqaralyq agenttikter atap ótkendeı, keıinge qaldyrý týraly sheshim, eń aldymen, shildede drýz toptary men súnnıttik bedýınder arasynda qandy qaqtyǵys bolǵan Sýveıda provıntsııasyndaǵy jaǵdaıǵa baılanysty qabyldandy.
Drýzdar – Sırııa, Lıvan jáne Izraıldegi qaýymdastyqtar. Sýveıda provıntsııasynda olar súnnıt taıpalarymen birge halyqtyń basym bóligi sanalady. Bul aımaqta burynnan beri negizinen jer máselesine baılanysty shıelenis bar.
Jaǵdaıdy turaqtandyrý úshin úkimet aımaqqa ásker bólimderin jiberdi. Izraıl jaǵdaıǵa aralasyp, Sırııa úkimetiniń pozıtsııalaryna áýeden soqqy berip, drýzdardyń qyrǵynyn boldyrtpadyq dep málimdedi. Alaıda Sırııa úkimeti bul áreketterdi eldiń ishki isine aralasý dep baǵalady.
Resmı atysty toqtatýǵa qaramastan, Sýveıda provıntsııasynda is júzinde atysty toqtatý turaqsyz, qaýipti qaqtyǵystar men shıelenis áli de jalǵasyp jatyr. Úkimet tártipti qalpyna keltirý jáne jaǵdaıdy baqylaýda ustaý úshin provıntsııanyń soltústik jáne batys bólikterine taraǵan ishki qaýipsizdik kúshterin ornalastyrdy.
Kúrd aımaqtary
Eldiń soltústik jáne soltústik-shyǵys provıntsııalary Rakka men Hasakede saılaý komıssııasy qaýipsizdik máseleleriniń áli de bar ekenine nazar aýdaryp, daýys berýdi «qolaıly jaǵdaı men qaýipsiz orta jasalǵansha» keıinge qaldyrý týraly sheshim qabyldady.
Búginde Rakka men Hasake provıntsııalarynyń bir bóligi kúrd jasaqtary mańyzdy ról atqaratyn Sırııa demokratııalyq kúshteriniń baqylaýynda.
Al Kúrd avtonomııasy ákimshiliginiń ókilderi saılaý komıssııasynyń sheshimin «demokratııaǵa qaıshy» dep aıyptap, aımaqtardyń salystyrmaly túrde turaqtylyǵy saqtalyp, daýys berýge múmkindik berip otyrǵanyn aıtty.
Málimdemede qaýipsizdik máseleleri basqa aımaqtarmen salystyrǵanda qaýipsiz dep sanalatyndyqtan provıntsııalardy alyp tastaýǵa negizdi sebep bolýy múmkin degendi joqqa shyǵarady.
Asadtan keıingi alǵashqy saılaý
Aldaǵy parlament saılaýy – Ahmed ash-Sharaa ótken jyldyń jeltoqsanynda bılikke kelgennen keıingi birinshi saılaý. Jańa prezıdent eski parlamentti taratyp, ýaqytsha konstıtýtsııa bekitip, bes jylǵa ótpeli kezeń ashty.
210 depýtattan turatyn QHA úshin daýys berý qyrkúıektiń 15-20-na josparlanǵan. Prezıdent Ahmed ash-Sharaa quramnyń úshten birin quraıtyn 70 músheni tikeleı taǵaıyndaýǵa quqyly. Qalǵan 140 oryn taǵaıyndalǵan jergilikti organdar arqyly tańdalady.
Saılaý komıssııasynyń basshysy Muhammad Taha ál-Ahmad ýaqytsha saılaý zańy shyqqannan keıin shaǵyn komıssııa qurý shamamen bir aptaǵa sozylatynyn, saılaý organdaryn anyqtaý úshin taǵy 15 kún qajet ekenin túsindirdi. Odan keıin kandıdattardy usynýǵa úsh kún bólinip, apta ishinde saılaýaldy úgit-nasıhat jumystary men kandıdattar arasynda pikirsaıys ótedi.
Buǵan deıin Sırııada Bashar Asad ketkennen keıin alǵash ret parlament saılaýy ótetinin jazǵan bolatynbyz.