Sırııa qaýipsizdik kúshterine «júzdegen beıbit turǵyndy óltirdi» degen aıyp taǵyldy

ASTANA. KAZINFORM – Baqylaýshylar qarýly top múshelerin qosqanda qurban bolǵandardyń jalpy sanyn myńǵa jýyq dep esepteıdi. Bul týraly VVS jazdy.

Ulybrıtanııada ornalasqan Sırııadaǵy adam quqyqtaryn baqylaý ortalyǵy (SOHR) juma jáne senbi kúnderi alavıtterge jasalǵan 30-ǵa jýyq shabýylda 745 beıbit turǵyn qaza tapqanyn málimdedi. Júzdegen adam úılerin tastap ketken.

Alavıtter, shııttik ıslamnyń bir tarmaǵy sanalatyn dinı top, Sırııa halqynyń shamamen 10 paıyzyn quraıdy. Sırııa turǵyndarynyń kópshiligi – sýnnıttik musylmandar.

Syria TV habaryna sáıkes, bılikten qýylǵan Bashar Asad rejımine qatysy bar qarýly adamdarmen beısenbi kúni qaqtyǵysqan sırııalyq qaýipsizdik kúshteriniń keminde 13 qyzmetkeri qaza tapqan. 

Qaqtyǵystar Asad áýletine tıesili Latakııa mańyndaǵy Djabla aımaǵynda bastaý alǵan. SOHR keıingi eki kúnde 1 000-nan astam adamnyń qaza tapqanyn, bul Sırııadaǵy kóterilisshiler Asad rejımin 2024 jyly jeltoqsanda qulatqannan bergi eń soraqy jáne keń taralǵan zorlyq-zombylyq ekenin aıtty. 

SOHR esebine sáıkes, zorlyq-zombylyq tolqyny ıslamshyldar basqaratyn úkimettik qaýipsizdik kúshteriniń 125-ke jýyq múshesi men Asadty qoldaıtyn 148 jaýyngerdi óltirdi. Bir kún buryn Sırııada qaýipsizdik kúshteriniń qolynan 340 beıbit turǵyn qaza tapqany habarlanǵan bolatyn.

Aıta keteıik, Sırııanyń birqatar qalasynda jaǵdaı shıelenisip, túrli toptar arasynda qaqtyǵystar júrip jatqanyn habarlaǵan edik.

Sondaı-aq Sırııanyń ýaqytsha prezıdenti zorlyq-zombylyqty toqtatýǵa shaqyrdy.