Sırııa «Islam memleketine» qarsy koalıtsııaǵa qosylatynyn jarııalady

ASTANA. KAZINFORM — Sırııa «Islam memleketi» ekstremıstik tobyna qarsy halyqaralyq koalıtsııaǵa qosylýǵa nıetti. Bul týraly AQSh prezıdenti ákimshiliginiń joǵary laýazymdy ókili rastady, dep habarlaıdy VVS.

Sırııa bıliginiń bul jospary týraly málimdeme dúısenbi kúni Aq úıde ótken AQSh prezıdenti Donald Tramp pen Sırııa prezıdenti Ahmed ash-Sharaa arasyndaǵy kezdesýden keıin belgili boldy.

Sırııa koalıtsııaǵa qosylatyn 90-shy memleket bolmaq. Uıymnyń basty maqsaty — «Islam memleketiniń» qalǵan jasaqtaryn joıý jáne Taıaý Shyǵysqa sheteldik sodyrlardyń kelýin toqtatý.

Fox News telearnasynyń Special Report baǵdarlamasyna bergen suhbatynda ash-Sharaa bul sapar onyń eli men AQSh arasyndaǵy «jańa dáýirdiń bastalýyn» bildiretinin atap ótti. Óz kezeginde Tramp sırııalyq áriptesine qoldaý bildirdi.

Aıta ketsek, bul eki el basshylarynyń bıylǵy úshinshi kezdesýi. Buǵan deıin olar mamyr aıynda Parsy shyǵanaǵy arab memleketteri yntymaqtastyǵy keńesiniń sammıti aıasynda jáne qyrkúıekte BUU Bas assambleıasy sessııasy kezinde ótken resmı qabyldaýda júzdesken edi.

Eske sala ketsek, AQSh prezıdenti Donald Tramp pen Sırııanyń ýaqytsha prezıdenti Ahmed ash-Sharaanyń Aq úıde kezdeskenin jazdyq. Al Tramp AQSh Sırııanyń tabysqa jetýi úshin qoldan kelgenniń bárin jasaıtynyn málimdedi.