Sırııa-Irak aımaǵynan Qazaqstanǵa 40-tan astam bala oraldy

ASTANA. QazAqparat - Sırııa-Irak aımaǵynan 125 qazaqstandyq, onyń ishinde 40-tan astam bala oraldy. Bul týraly búgin Úkimet otyrysynan keıin QR Terrorızmge qarsy ortalyǵy shtabynyń bastyǵy Janat Saıpoldaev aıtty, dep habarlaıdy QazAqparat.

«Elge oralǵan tulǵalardyń qatarynda soǵys is-qımyldaryna qatysqandarmen birge áıelder de, balalar da bar. Sondyqtan osyndaı san shyǵyp otyr. Balalarǵa qatysty naqty tsıfrdy aıta almaımyn. Biraq olar shamamen 45-ke jýyqtaıdy», - dedi ol.

Onyń atap ótýinshe, qalǵan qazaqstandyqtarǵa úzdiksiz jedel baqylaý qoıylyp, aldyn alýǵa baǵyttalǵan sharalar júrgizilýde.

Aıta keterligi, Úkimet otyrysynda QR Ulttyq qaýipsizdik komıteti tóraǵasynyń orynbasary Nurǵalı Bilisbekov qazirgi kezde Qazaqstanǵa 125 azamat qaıta oralyp, olardyń 57-si sottalǵanyn, qalǵandary baqylaýǵa alynǵan aıtqan bolatyn.