Sırııa halqynyń jartysyna jýyǵy ashtyqtyń aldynda
ASTANA. 7 qarasha. QazAqparat - Sırııa halqynyń 40 paıyzǵa jýyǵy, jalpy alǵanda 9,3 mln. adam shuǵyl túrde gýmanıtarlyq kómekke muqtaj, dep habarlaıdy muslim.kz.
BUU bas hatshysynyń gýmanıtarlyq kómek kórsetý jónindegi orynbasary Valerı Amos Qaýipsizdik keńesiniń májilisinde osyndaı málimdeme jasady.
Onyń aıtýynsha, gýmanıtarlyq kómekke muqtaj adamdardyń sany tek qyrkúıek aıynyń ózinde 2,5 mln. turǵynǵa ósken. «Qaýipsizdik keńesi janjaldasyp, jaýlasýǵa kóshken eki jaqty da soǵystan zardap shekkenderge gýmanıtarlyq kómektiń jetýine bóget jasamaýyna yqpal etýi tıis», - deıdi ol.
Sırııa memleketinde jalpy halyq sany 23 mln. adamdy quraıdy. Onyń ishinde 2,5 mln-nan asa adam álemnen oqshaýlanyp qalǵan aýdandarda turatyndyqtan dári-dármekke, elektr qýatyna jáne ózge de kerek-jaraqqa óte zárý. Iordanııa sekildi kórshi memleketter sırııalyq bosqyndardyń máselesin sheshý úshin kóp kúsh-jiger jumsap otyrǵanyn aıta ketý kerek.
BUU esebi boıynsha, 2011 jyly bul elden 2 mln-ǵa jýyq adam ketken. Olardyń kóbisi Lıvan, Iordanııa, Túrkııa, Irak jáne Mysyr elderine bas saýǵalaǵan.
Sırııadaǵy azamattyq soǵystan osy ýaqytqa deıin 100 myńnan asa adam qaza tapty.
