Sırııa Halyq keńesiniń tóraǵasy saılandy
ASTANA. KAZINFORM — Bashar Asad rejımi qulatylǵannan keıin alǵash ret Sırııa Halyq keńesiniń otyrysy ótti. Onyń qorytyndysy boıynsha Abdelhamıd Avvak Sırııa Halyq keńesiniń tóraǵasy bolyp saılandy, dep habarlaıdy Anadoly.
Ótpeli kezeń aıasynda jasaqtalǵan jańa parlamenttiń alǵashqy otyrysynda Abdelhamıd Avvak Sırııa Halyq keńesiniń tóraǵasy bolyp saılandy.
Daýys berý qorytyndysy boıynsha Abdelhamıd Avvak 99 daýys, Mýaııad Kabalavı — 75, al Muhammad Koreıdj 31 daýys jınady.
Saılanǵannan keıin saıasatker ant qabyldap, resmı túrde qyzmetine kiristi.
Sırııadaǵy ótpeli kezeń aıasynda qurylǵan Halyq keńesiniń ókilettik merzimi 30 aı bolyp belgilendi.
Buǵan deıin AQSh Sırııany terrorızmdi qoldaıtyn elder tiziminen shyǵarýdy josparlap otyrǵanyn jazǵanbyz.
Sonymen qatar Sırııaǵa Hımııalyq qarýǵa tyıym salý uıymyna daýys berý quqyǵy qaıtarylǵany anyqtaldy.
