Sırııa demokratııalyq kúshteri ózin taratatynyn málimdedi
ASTANA. KAZINFORM — Elde qarýly qurylymdardy biryńǵaı memlekettik basqarý júıesine biriktirýdiń mańyzdy kezeńi aıaqtaldy, dep habarlaıdy Kazinform agenttiginiń menshikti tilshisi.
«Sırııa demokratııalyq kúshteriniń» (SDK) qolbasshysy Mazlým Abdı qurylymnyń derbes áskerı kúsh retinde taratylyp, el armııasynyń quramyna kiretinin jarııalady. Bul týraly ol seısenbide Damaskidegi Prezıdent saraıynda málimdedi, dep habarlaıdy SANA agenttigi.
— Búgin biz «Sırııa demokratııalyq kúshteri» mıssııasynyń aıaqtalǵanyn jáne onyń derbes áskerı kúsh retinde taratylǵanyn jarııalaımyz, — dedi Mazlým Abdı.
Onyń aıtýynsha, bul sheshim Sırııa Prezıdenti Ahmed ash-Sharaamen kelisim jasalǵannan keıin jáne SDK bólimshelerin Sırııa armııasynyń quramyna biriktirý úderisi aıaqtalǵan soń qabyldanǵan.
Sol kúni Ahmed ash-Sharaa Mazlým Abdımen kezdesý ótkizdi. Onda eldiń soltústik-shyǵysyndaǵy qurylymdardy memlekettik ınstıtýttarǵa biriktirý máselesi men qaýipsizdikti nyǵaıtýǵa baǵyttalǵan sharalar talqylandy.
Eske sala keteıik, «Sırııa demokratııalyq kúshteri» 2015 jyly qurylyp, kúrd jáne arab qarýly qurylymdarynyń koalıtsııasy retinde qalyptasty. Onyń negizin kúrdterdiń «Halyqty qorǵaý jasaqtary» qurady. Atalǵan qurylym AQSh-tyń qoldaýymen «Islam memleketi» terrorıstik uıymyna (Qazaqstanda tyıym salynǵan uıym — red. eskertpesi) qarsy operatsııalarǵa qatysty. Keıin uıym Sırııanyń soltústik-shyǵysyndaǵy, sonyń ishinde iri munaı-gaz ken oryndary ornalasqan óńirlerdi óz baqylaýynda ustady.
Qańtarda Damask bıligi men SDK basshylyǵy kúrd kúshterin memlekettik ınstıtýttar quramyna kezeń-kezeńimen engizý jóninde ýaǵdalasqan bolatyn.
Naýryz aıynda «Halyqtyń óz-ózin qorǵaý jasaǵynyń» qolbasshysy Sıpan Hamo Sırııanyń shyǵys óńirlerine jaýapty qorǵanys mınıstriniń orynbasary qyzmetine taǵaıyndaldy.
Mazlým Abdı bıyl bılik kúrd tilinde bilim berý týraly sheshimdi iske asyrýdy bastaıtynyn málimdedi. Onyń aıtýynsha, jańa Sırııa kúrdter, arabtar, túrikmender men assırııalyqtar úshin ortaq ári birtutas memleket bolýǵa tıis.
Aıta keteıik, buǵan deıin AQSh Sırııany «terrorızmdi qoldaıtyn elder» tiziminen shyǵarǵan bolatyn.
