Sırııa Chevron kompanııasymen teńiz munaı ken ornyn ıgerý týraly kelisimge qol qoıdy

ASTANA. KAZINFORM – Syrian Petroleum kompanııasy eldegi alǵashqy teńiz munaı jáne gaz ken ornyn ıgerý týraly AQSh jáne Qatarmen ózara túsinistik týraly memorandýmǵa qol qoıdy, dep habarlaıdy NBC News.

Syrian Petroleum kompanııasynyń amerıkalyq energetıka alyby Chevron jáne Qatardyń Power International Holding kompanııasymen kelisimine Damaskide AQSh-tyń Sırııa boıynsha arnaıy elshisi Tom Barraktyń qatysýymen qol qoıyldy.

Sırııanyń memlekettik aqparat agenttigi SANA-nyń habarlaýynsha, kelisim energetıka salasyndaǵy strategııalyq seriktestikti nyǵaıtýǵa baǵyttalǵan. Sondaı-aq Sırııanyń aýmaqtyq sýlaryndaǵy munaı jáne gaz resýrstaryn teńizde barlaý jáne ıgerý salasyndaǵy yntymaqtastyqty, ınvestıtsııalardy qoldaý jáne energetıka salasyn damytý boıynsha aýqymdy kúsh-jigerdi qamtıdy.

Sırııanyń munaı jáne gaz ónerkásibine eldegi jarty mıllıon adamnyń ómirin qıǵan 15 jylǵa jýyq qaqtyǵys keri áserin tıgizdi. 2011 jyldyń naýryz aıynda burynǵy prezıdent Bashar Asadqa qarsy kóterilis týdyrǵan qaqtyǵys bastalǵanǵa deıin munaı sektory Sırııa ekonomıkasynyń negizi boldy. El kúnine shamamen 380 000 barrel munaı óndirip, 2010 jyly 3 mıllıard dollardan astam munaı eksporttady. Munaıdan túsken kiris memlekettik bıýdjettiń shamamen tórtten bir bóligin qurady.

Buǵan deıin Chevron kompanııasynyń Lukoil kompanııasynyń sheteldik aktıvterin satyp alýdy qarastyryp jatqany habarlanǵan bolatyn.