Sırııa boıynsha halyqaralyq kezdesý mamyrda elordada ótedi
Birlesken málimdemeni QR Syrtqy ister mınıstriniń orynbasary Aqylbek Kamaldınov oqyp berdi. Onda: «Biz naýryzda Jenevada kelissózderdiń jalǵasýyna qoldaý bildiremiz. Úshjaqty kezdesý joǵary deńgeıde jalǵasatyndyǵyn atap ótemiz. Sırııa Úkimeti men Sırııa oppozıtsııasynyń ókilderi, sonymen birge baıqaýshy retinde basqa da taraptar bul otyrystarǵa shaqyrylýy múmkin. Biz joǵary deńgeıdegi kelesi otyrysty 3-4 mamyrda Astanada ótkizý týraly sheshim qabyldadyq jáne 2017 jyldyń sáýirinde Tehranda sarapshylar konsýltatsııalaryn ótkizýge kelistik. Qazaqstan Prezıdenti Nursultan Nazarbaevqa jáne qazaq bıligine osynaý kezdesýdi ótkizgeni úshin rızashylyǵymyzdy bildiremiz», - delingen.
Sonymen qatar Kamaldınov Qazaqstan jáne Prezıdent Nursultan Nazarbaev kelissózderge oryn usynyp qana qoımaı, sonymen birge bitimgershilik usynystaryn da beretindigin jalǵastyratyndyǵyn basa aıtty.
«Qazaqstan bul janjalda beıtarap ári obektıvti araaǵaıyn bolyp qala beredi. Astana Sırııa boıynsha bolashaqtaǵy kelissózder úshin yńǵaıly oryn bolýyn jalǵastyrady», - dedi mınıstr orynbasary.
Aıta keterligi, kepilger elderdiń birlesken málimdemesinde Astana protsesi Sırııadaǵy turaqtylyqty qamtamasyz etýde tıimdi jumys isep jatqandyǵy atalyp ótilgen. Degenmen, mańyzdy ilgerileýshilik bolmaǵanymen Astana jáne Jeneva protsesteri Sırııadaǵy soǵysty jáne atys qımyldaryn toqtatý rejiminiń júzege asyrylýyna septigin tıgizgendigi basa atap ótilgen.
«Sırııadaǵy qaqtyǵystardyń aıaqtalýy jaıynda aıtýǵa áli erte. Degenmen, bizdiń aldymyzda kúrdeli jol jatyr. Biraq, biz kúsh-jigerimizdi biriktirý arqyly terrorızmmen jáne ekstremızmmen kúrese alamyz. Bizdiń Astana protsesi óziniń tájirıbelik úlesin qosatyndyǵyna senimimiz mol», - delingen birlesken málimdemede.
