Sırııa boıynsha Astana protsesiniń jumysy taǵy da jalǵasady
NUR-SULTAN. QazAqparat – Astana protsesiniń 19-shy kezdesýi 2022 jyldyń ekinshi jartysynda Nur-Sultan qalasynda ótedi. Bul jaıynda Sırııa boıynsha 18-shi halyqaralyq kezdesýdiń qorytyndysy boıynsha Iran, Reseı jáne Túrkııa ókilderiniń birlesken málimdemesinde aıtylǵan, dep habarlaıdy QazAqparat tilshisi.
«Biz Astana formatyndaǵy baqylaýshylar retinde Iordanııa, Irak jáne Lıvan delegatsııalarynyń, sondaı-aq BUU men HQKK ókilderiniń qatysýyn qanaǵattanýshylyqpen atap óttik. Nur-Sultanda Astana formatynda Sırııa boıynsha 18-shi halyqaralyq kezdesýdi ótkizgeni úshin Qazaqstan bıligine shynaıy alǵysyn bildiremiz. Sırııa boıynsha Astana formatyndaǵy 19-shy halyqaralyq kezdesýdi osy jyldyń ekinshi jartysynda Nur-Sultanda ótkizýge kelistik», - delingen QR Syrtqy ister mınıstriniń orynbasary Ádil Tursynov jarııa etken birlesken málimdemede.
Sonymen qorytyndy qujatta kepilger elder Astana formatynda mınıstrlerdiń kelesi kezdesýin uıymdastyrý nıetterin rastady.
«Biz 2020 jyldyń 1 shildesindegi sammıttiń qorytyndy málimdemesinde bekitilgen kelesi úshjaqty sammıtti sharttar ruqsat etilgen kezde tez arada Iran Islam Respýblıkasynda ótkizý týraly kelisimdi taǵy da atap óttik», - dedi kepilger elder.
